Prokuroria Themelore në Pejë ka hapur rast penal ndaj Joz Markut lidhur me incidentin me Edin.
Zëdhënësi i Prokurorisë Themelore në Pejë ka bërë të ditur se rasti është iniciuar me vetiniciativë nga prokurori kujdestar, për veprën penale “Lëndim i lehtë trupor”.
“Prokurori i Shtetit nga Prokuroria Themelore në Pejë, përkatësisht prokurori kujdestar, me vetiniciativë ka hapur rast penal ndaj J.M., shtetas i Republikës së Shqipërisë, për veprën penale ‘Lëndim i lehtë trupor’, të shkaktuar ndaj shtetasit të Republikës së Kosovës, E.K.”, thuhet në përgjigjen e Prokurorisë për Insajderin.
Sipas Prokurorisë, Policia e Kosovës është autorizuar për inicimin e rastit, vendosjen e të dyshuarit në “stop list” dhe ndërmarrjen e veprimeve të tjera ligjore.
“Veprimet janë ndërmarrë nga dispozitat ligjore të nenit 109 të Kodit Penal të Republikës së Kosovës, i cili zbatohet ndaj cilitdo person të huaj i cili ka kryer veprën penale jashtë territorit të Republikës së Kosovës ndaj shtetasit të saj”, thuhet më tej.
Ndërkohë, në pamjet e publikuara së fundmi shihen momente të rënda të përleshjes, ku Edi shihet i plagosur dhe i kërkon Jozit të ndalojë. Megjithatë, përleshja vazhdon edhe për disa momente.
Në fund të videos, Jozi shihet duke i kërkuar Edit të ulet në gjunjë dhe t’i kërkojë falje. Edi, i cili në atë moment duket i dëmtuar, e bën këtë veprim përpara tij.
Pamjet e plota janë publikuar pas videos së parë të incidentit, e cila kishte nxitur reagime të shumta në rrjetet sociale.
Vetë Edi kishte publikuar më herët një fragment të përleshjes në InstaStory, duke e shoqëruar me mbishkrimin: “Pabesia dhe tradhtia kanë rrëzuar edhe mbretër! 15 me 1 në konakun e tyre! Shikim të këndshëm”.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
