Vulin falënderon publikisht Rusinë për ndihmën ndaj kriminelit të luftës Mlladiq

Lajme

Gazeta Express

07/09/2026 10:23

Ish-shefi i BIA-s, Aleksandar Vulin, aktualisht kryetar i Lëvizjes Socialiste në Serbi, ka ngritur lartë figururën e kriminelit të luftës Ratko Mlladiq. Sipas Vulinit, Mladiq është “hero serb”, por edhe “hero i të gjithë njerëzve të lirë”.

Në një intervistë për Sputnik, Vulin ka bërë edhe një deklaratë që dëshmon sërish afërsinë e tij me Rusinë, duke e falënderuar publikisht shtetin rus për mbështetjen që, sipas tij, i ka dhënë Mlladiqit gjatë kohës që ai vuante dënimin në Hagë.

“Jam mirënjohës ndaj shtetit rus sepse aktivisht ka ndihmuar që pozita e gjeneralit Mlladiq në burgun e Hagës të përmirësohej. Më vjen keq që të gjithë së bashku nuk arritëm ta çlironim dhe më vjen keq që nuk arritëm të luftonim që ai të kishte të drejtën të vdiste së paku me ata që i donte”, ka deklaruar Vulin.

Ai ka sulmuar edhe Tribunalin e Hagës, duke pretenduar se ky institucion “nuk shërben për të gjetur drejtësi”, por për “hakmarrje ndaj serbëve”.

“Bashkimi Evropian ushtron presion të madh që serbët ta harrojnë gjeneralin Mlladiq. Këtë nuk mund t’ia bëni popullit serb. Populli serb ka zgjedhur të jetë me gjeneralin Mlladiq, populli serb ka zgjedhur të jetë i lirë”, ka thënë ai.