“Shëndetësia falas” e Ramës? PD: Shqiptarët paguajnë nga xhepi 48.3% të shpenzimeve

Partia Demokratike ka denoncuar kostot që, sipas saj, qytetarët shqiptarë përballojnë për shërbimet shëndetësore, duke iu referuar shifrës 48.3% të shpenzimeve që paguhen drejtpërdrejt nga familjet.

Sekretari për Aksionin Qytetar në PD, Erges Eskiu, deklaroi se kjo është përqindja më e lartë në Europë dhe, sipas tij, bie ndesh me propagandën e qeverisë për një “shëndetësi falas”.

Eskiu tha se qytetarët, pavarësisht se paguajnë taksa dhe sigurime shëndetësore, përballen sërish me pagesa të drejtpërdrejta për analiza, barna, ekzaminime dhe trajtime mjekësore.

Sipas tij, situata rëndohet edhe nga niveli i ulët i financimit publik. PD pretendon se shpenzimet shëndetësore për frymë në Shqipëri janë rreth 40% e mesatares së Bashkimit Europian, duke bërë që një pjesë e konsiderueshme e barrës financiare të bjerë mbi familjet.

Përfaqësuesi i PD-së ngriti shqetësimin edhe për kategoritë më të prekura nga kostot shëndetësore, veçanërisht pensionistët, pacientët me sëmundje kronike dhe familjet me të ardhura të ulëta. Sipas tij, pamundësia ekonomike i detyron disa qytetarë të marrin borxhe, të shesin pasuri apo të heqin dorë nga trajtimi.

Në deklaratën e tij, Eskiu akuzoi gjithashtu qeverinë për orientimin e fondeve të shëndetësisë drejt koncesioneve dhe kontratave që, sipas PD-së, kanë favorizuar klientë të qeverisë.

PD propozon gjithashtu një skemë të re sigurimesh shëndetësore, të bazuar sipas saj në modelin gjerman, si dhe forcimin e mjekësisë së familjes, programe të posaçme për të moshuarit dhe depistime të orientuara sipas moshës dhe faktorëve të rrezikut.

Një tjetër pikë e programit është krijimi i një fondi të posaçëm për barnat dhe pajisjet e trajtimit të sëmundjeve tumorale, me synimin që pamundësia ekonomike të mos bëhet pengesë për marrjen e mjekimit.

Sa i përket koncesioneve, PD kërkon rishikimin e atyre që i konsideron abuzive dhe rikthimin e fondeve në sistemin publik shëndetësor.

Deklarata e Sekretarit për Aksionin Qytetar në PD, Erges Eskiu:

Shqiptarët paguajnë drejtpërdrejt nga xhepi 48.3 për qind të të gjitha shpenzimeve për shëndetin, përqindja më e lartë në Europë. Ky është realiteti pas propagandës 13-vjeçare të Edi Ramës për të ashtuquajturën ‘shëndetësi falas’.

Pothuajse gjysma e çdo analize, ilaçi, ekzaminimi apo trajtimi shëndetësor paguhet drejtpërdrejt nga qytetari shqiptar. Askund tjetër në Europë familjet nuk mbajnë mbi shpatulla një pjesë kaq të madhe të faturës së kujdesit shëndetësor.

Shqiptarët paguajnë taksa, paguajnë sigurime shëndetësore, por kur sëmuren, detyrohen të paguajnë përsëri nga xhepi.

Kjo nuk është shëndetësi falas, por sistemi zhvatës ku qytetarët paguajnë tri herë.

Ndërkohë, konsumi shëndetësor për frymë në Shqipëri është vetëm rreth 40 për qind e mesatares së Bashkimit Europian. Pra, shteti financon pak, shërbimi publik ofron pak dhe familjet detyrohen të paguajnë më shumë.

Kjo faturë godet veçanërisht pensionistët, të sëmurët kronikë dhe familjet me të ardhura të ulëta. Për mijëra shqiptarë, sëmundje do të thotë mjerim: ata marrin borxhe, shesin pasuri ose heqin dorë nga mjekimi sepse nuk mund ta përballojnë.

Në të njëjtën kohë, qindra milionë euro të buxhetit të shëndetësisë janë devijuar drejt koncesioneve dhe kontratave klienteliste. Paratë që duhet të shkonin te pacientët, barnat, mjekët dhe spitalet kanë financuar interesat e klientëve të qeverisë.

Partia Demokratike e konsideron shifrën 48.3 për qind aktakuzën më të qartë ndaj dështimit të modelit shëndetësor të Edi Ramës.

Me ardhjen, së shpejti, në krye të qeverisjes së vendit të Partisë Demokratike, do të vijë edhe përmbysja e këtij sistemi zhvatës dhe riprëtëritja e sistemit shëndetësor. 

Programi ynë është i qartë dhe i palëkundur:

-dyfishimin e buxhetit të shëndetësisë, me financim të drejtpërdrejtë për barnat, diagnostikimin, spitalet dhe kujdesin parësor;

-krijimin, sipas modelit gjerman, të një skeme të re sigurimesh shëndetësore, me më shumë alternativa, konkurrencë dhe cilësi për pacientin;

-zgjerimin e listës së barnave të rimbursueshme, garantimin e cilësisë së tyre dhe uljen e çmimeve përmes prokurimeve transparente dhe bashkëpunimit rajonal;

-dyfishimin e pagave për mjekët dhe infermierët, për të ndalur largimin e personelit shëndetësor dhe për të rikthyer profesionistët shqiptarë;

-pajisjen e spitaleve me teknologji moderne diagnostikuese dhe mjekuese dhe përfundimin e kartelës elektronike të pacientit;

-krijimin e një fondi të posaçëm për barnat dhe aparaturat kundër kancerit, në mënyrë që asnjë pacient të mos mbetet pa mjekim për shkak të pamundësisë ekonomike;

-forcimin e mjekësisë së familjes, programe të posaçme për të moshuarit dhe depistim të orientuar sipas moshës dhe rrezikut shëndetësor;

-rishikimin e koncesioneve abuzive dhe rikthimin e parave të tyre te pacientët dhe sistemi publik.

Objektivi ynë është i matshëm: të ulim ndjeshëm pjesën që shqiptarët paguajnë sot nga xhepi dhe të garantojmë që askush të mos heqë dorë nga analizat, ilaçet apo trajtimi sepse nuk ka para.

Paratë e shëndetësisë do të ndjekin pacientin, jo koncesionarin. Ky është ndryshimi ndërmjet propagandës së ‘shëndetësisë falas’ dhe një qeverisjeje të Partisë Demokratike, që mbron qytetarin.