Blerja e një banese në Greqi do të bëhet shumë më e kushtueshme për shtetasit e vendeve jashtë Bashkimit Europian, përfshirë edhe shqiptarët.
Nga 1 janari 2027, qeveria greke parashikon rritjen e taksës së transferimit të banesës për blerësit nga vendet e treta, nga 3% në 15%.
Për një banesë me vlerë 300 mijë euro, taksa do të rritet nga 9 mijë në 45 mijë euro. Pra, një blerës i huaj do të paguajë 36 mijë euro më shumë vetëm për transferimin e pronës.
Për një shtëpi me vlerë 500 mijë euro, detyrimi rritet nga 15 mijë në 75 mijë euro, duke sjellë një kosto shtesë prej 60 mijë eurosh.
Masa do të zbatohet vetëm për blerjen e banesave dhe nuk do të përfshijë ambientet tregtare, parcelat apo kategoritë e tjera të pasurive të paluajtshme.
Qeveria greke synon të frenojë kërkesën nga të huajt, të cilën e konsideron një prej faktorëve që ka shtyrë lart çmimet dhe ua ka vështirësuar familjeve vendase blerjen e një shtëpie.
Rritja e taksës nuk e shfuqizon programin “Golden Visa” dhe as ua ndalon të huajve blerjen e banesave. Megjithatë, ajo e bën investimin ndjeshëm më të shtrenjtë dhe mund të ulë interesin e shtetasve jashtë BE-së për tregun grek. Masa është pjesë e paketës së strehimit për vitin 2027, e cila përfshin gjithashtu kredi të subvencionuara për familjet greke, kufizime ndaj pronave të reja në Airbnb dhe lehtësi tatimore për banesat që kalojnë në qira afatgjatë.