Një ngjarje e rëndë ka tronditur futbollin amator në Gjermani, ku një 35-vjeçar është arrestuar për një vrasje të dyshuar me helm.
Futbollisti, i identifikuar si Marius, dyshohet se i ka dhënë në mënyrë të fshehtë helm shokut të tij të skuadrës, Filip.
Ngjarja dyshohet se ka ndodhur gjatë një udhëtimi të ekipit në Drezden.
Filipi, 30 vjeç, u ndje keq gjatë udhëtimit, por gjendja e tij u përkeqësua pasi u kthye në shtëpi.
Familjarët e tij thirrën menjëherë ambulancën, por ai ndërroi jetë një ditë më vonë në spital.
Autopsia zbuloi se vdekja ishte shkaktuar nga helmimi, i cili kishte sjellë dështimin e organeve.
Fillimisht, familjarët dyshuan se 30-vjeçari mund të ishte helmuar nga peshku, pasi ekipi kishte konsumuar peshk gjatë udhëtimit.
Por hetuesit nisën të dyshonin për shokun e tij të skuadrës, Marius.
Prokurori publik Tomas Hauburger tha se autoritetet dyshojnë se bëhej fjalë për një akt hakmarrjeje.
Sipas zërave që qarkullojnë në Rokenberg, dy futbollistët kishin pasur konflikte për shkak të një gruaje.
Marius u arrestua më 1 shtator dhe ndodhet aktualisht në paraburgim.
Ai nuk ka dhënë asnjë deklaratë lidhur me akuzat e ngritura ndaj tij.
Ngjarja ka shkaktuar tronditje të madhe te klubi amator TuS Rockenberg dhe komuniteti lokal.
