Kryeministri Rama: Po hartojmë program kombëtar për IA, vetëm 9% e bizneseve e përdorin

Kryeministri Edi Rama, i pranishëm në punimet e Forumit të Inovacionit, deklaroi se qeveria është duke hartuar një program për Inteligjencën Artificiale.

“Këtu kemi në qendër të bisedave të ditës së sotme Inteligjencën Artificiale, për të cilën ne po përgatitemi për një program kombëtar, ku të gjithë do të kenë mundësi të thonë fjalën e tyre dhe të gjejnë vendin e tyre.

Gjithashtu, ne jemi të vetëdijshëm se të gjitha temat e diskutimit janë në një dinamikë të jashtëzakonshme, gjë që, nga njëra anë, është një bekim i madh për vende si i yni, sepse mund të bëjmë kapërcime të mëdha falë teknologjisë dhe, nga ana tjetër, është një sinjal i vazhdueshëm alarmi, sepse po ashtu mund të mbetemi shumë mbrapa nëse nuk ecim me ritmin e kësaj kohe të re.

Janë 3 elementë që dua të mbajmë parasysh për ndërveprimin mes nesh: së pari, problemet reale. Së dyti, propozime konkrete. Së treti, gatishmëri për t’u angazhuar të gjithë së bashku, sepse këtë program jeni ‘të dënuar’ ta ndjekim së bashku.”

Kryeministri Edi Rama u ndal edhe në ecurinë e sektorit të teknologjisë, zhvillimet e tij dhe rritjen e numrit të të punësuarve.

“Sot eksporti i teknologjisë arrin në 222 mln euro produkte inovative, 3 herë më shumë sesa pak vite më parë. Janë aktivë gati 28,500 profesionistë. Dhe 7 nga 10 punonjës janë nën moshën 35 vjeç.

Sot kemi një rritje pagash shumë domethënëse në këtë sektor dhe në PBB sektori ka një peshë të lexueshme prej 2.2%, një shifër kuptimplotë për potencialin e vet.

Kemi një fatmirësi, sepse në platformën e-Albania kemi 3.4 mln subjekte dhe qytetarë të regjistruar.

Është domosdoshmëri që të ngremë një strukturë publike të cloud-it, që të bëjë të mundur që të dhënat shtetërore të jenë të aksesueshme dhe të sigurta. Ndërkohë, kemi filluar të eksplorojmë mundësinë e ngritjes së data center-ave.

Nëse sektori publik ka një avantazh të madh, për shkak të progresit, në sektorin privat janë shumë prapa. Vetëm 24% e bizneseve tregtojnë online.

9% e sipërmarrjeve përdorin Inteligjencën Artificiale, kundrejt 90% të qytetarëve që kanë akses online. Këto të dhëna janë shqetësuese.

Do të vazhdojmë mbështetjen për startup-et. Kemi bërë dyfishimin e fondit. Të njëjtën gjë do të bëjmë vitin e ardhshëm, nëse do të paraqitet i njëjti trend vitin e ardhshëm.

Kemi në plan të bëjmë disa pilotë, në sektorin e bujqësisë, turizmit, shëndetësisë, si dhe financave, që të rrisim përdorimin e teknologjisë.

Janë 9 mijë studentë që merren me teknologji. Numri i vajzave është ndër më të lartët në Europë”, pohoi ndër të tjera Rama.