Një operacion i gjerë ndërkombëtar ka çuar në shkatërrimin e një rrjeti bankar ilegal që financoi disa nga trafikantët më të mëdhenj të kokainës në Evropë.
Hetimi nisi në vitin 2021, pas sekuestrimit të 1.84 tonëve kokainë nga anija “Nehir”. Sipas policisë spanjolle, anija ishte fundosur qëllimisht në portin verior të Gijon-it, për të fshehur një ngarkesë tjetër prej 1.65 tonësh kokainë.
Nga ky rast, hetuesit zbuluan një sistem financiar paralel, të quajtur “narko-banka”, që financonte transportin e drogës, lëvizte para ndërkombëtarisht jashtë sistemit bankar zyrtar, përdorte kriptovaluta dhe pastronte paratë e pista.
“Pa këtë financim, këto dërgesa nuk mund të transportoheshin nga një vend në tjetrin. Trafikimi i drogës në këtë shkallë nuk do të ishte i mundur”, deklaroi kryeinspektoria e Shërbimit Kundër Pastrimit të Parave në Spanjë.
Policia spanjolle njoftoi se në kuadër të operacionit janë arrestuar 21 persona në disa shtete, ndërsa 12 të tjerë janë ende në kërkim. Nga të arrestuarit, 14 u kapën në Spanjë dhe 7 të tjerë në Emiratet e Bashkuara Arabe, Egjipt, Holandë dhe Suedi.
Europol, që mbështeti hetimin, bëri me dije se mes të arrestuarve është edhe një bankier ilegal i konsideruar si objektiv me vlerë të lartë, një nga bankierët më të mëdhenj të fshehtë në botë.
Gjatë operacionit janë sekuestruar asete me vlerë totale rreth 20 milionë euro, konkretisht 121 llogari bankare me 2.3 milionë euro, 48 prona me vlerë mbi 14 milionë euro dhe automjete luksoze me vlerë mbi 1.6 milionë euro, si dhe asete të tjera.
Sondazh
Lexo gjithashtu
