Protesta kundër qeverisë ka shënuar këtë të hënë 100 ditë rezistencë, ndërsa qytetarët janë rikthyer në rrugët e Tiranës për të përsëritur kërkesat e tyre ndaj qeverisë.
Tubimi nisi pas orës 19:00 në sheshin “Skënderbej”, ku protestuesit hodhën një sërë thirrjesh kundër kryeministrit Edi Rama dhe qeverisë. “Ju erdhi fundi”, “Shqipëri e re”, “Rama jep dorëheqjen” dhe “Rama në burg, Berisha në burg” ishin disa prej sloganeve të dëgjuara gjatë protestës.
Pas grumbullimit në shesh, protestuesit marshuan në drejtim të Bulevardit “Dëshmorët e Kombit” dhe u ndalën përpara godinës së Kryeministrisë, ku vijuan fjalimet dhe thirrjet kundër qeverisjes.
Në ditën e 100-të, protestuesit zhvilluan edhe një aksion simbolik. Të kapur dorë për dore, ata formuan një rreth përreth godinës së Kryeministrisë, duke përcjellë mesazhin e bashkimit dhe qëndrueshmërisë së protestës.
Kërkesa kryesore e tyre vijon të jetë dorëheqja e Edi Ramës dhe e qeverisë, ndërsa organizatorët kanë paralajmëruar se protesta do të vijojë edhe në ditët në vazhdim.
