VIDEO shokuese/ U terrorizua nga ‘skifterët’ shqiptarë, rrëfehet stilistja: Ajo dhomë është sekret

Stilistja spanjolle e modës ka përjetuar frikën më të madhe të jetës së saj pasi dy hajdutë hynë në dhomën ku ajo ruan të gjitha bizhuteritë që përdor për veshjet e saj. Osorno thotë se bëhet fjalë për një dhomë që askush nuk e njeh, për shkak të vlerës së bizhuterive që ndodhen brenda.

Nga Sofia Avendano, ANTENA3

Më 5 shtator, influencuesja dhe stilistja Rocío Osorno përjetoi një vjedhje në banesën e saj në Sevilje të Spanjës.

Kjo ndodhi ndërkohë që ajo ndodhej brenda së bashku me fëmijët e saj të mitur. Influencuesja ka publikuar në rrjetet e saj sociale videon e kapur nga kamerat e sigurisë në dhomën ku u futën hajdutët, me sa duket dy, siç shihet në pamje.

Në këto pamje mund të shohim dy burra me kapuçë dhe të mbuluar nga koka te këmbët, të cilët hyjnë në dhomë me qetësi të plotë. Megjithatë, sapo fillojnë të dëgjojnë britmat e Osornos nga kopshti, nisin të shpejtojnë. Sipas influencueses, ata ishin me origjinë shqiptare dhe, në përkthimin që i kanë dërguar, dëgjohen duke thënë: “Hajde, hajde, nxito”.

Osorno, pasi e dëgjoi përsëri regjistrimin, pranon se “të dridhet zemra”. Ajo tregon se si ndodhi gjithçka.

“Kisha qenë gjithë ditën jashtë duke filmuar, ishte ora 12:30 e natës dhe isha e lodhur. Mund të kisha qenë duke filmuar, por Zoti nuk deshi”, nis rrëfimin ajo.

Historia vazhdon: “Shikova me bisht të syrit dhe dritarja ishte e hapur dhe pikërisht fëmija i vogël kishte qenë me mua lart dhe thashë: ‘mos është fëmija që është ngjitur lart?’. Unë nuk i lë kurrë ta hapin, sepse kam frikë se mos bien. Atëherë thashë: ‘jo, nuk besoj se është fëmija’. Pastaj pashë hijen, vrapova poshtë, hapa derën e pasme të shtëpisë dhe lëshova britmën e jetës sime”.

Stilistja tregon se më pas filluan të dëgjoheshin të gjithë fqinjët, qentë e tyre...

Ajo siguron se kurrë nuk do të ishte përballur me hajdutët, “edhe sikur të kishin marrë gjithë shtëpinë time”.

Influencuesja e modës tregon se tashmë ka bërë kallëzim, por ende nuk dihet se si ndodhi gjithçka dhe çfarë informacioni kishin hajdutët. Në fakt, ajo siguron se bëhet fjalë për një dhomë për të cilën nuk i flet askujt.

“Në shtëpinë time hyn gjithë bota gjatë gjithë kohës, hyjnë shumë njerëz dhe ne filmojmë. Nëse ka pasur ndonjë informator që ka dhënë informacion, nuk e di. Është një zonë e shtëpisë sime që nuk e tregoj kurrë në rrjetet sociale. Është e vërtetë që, të shkosh drejtpërdrejt në dhomën ku ndodhej gjithë plaçka që ata kërkonin... të bën të mendohesh”.

Sipas saj, dihet se në atë zonë ka banda të organizuara. “Po flasim për banda të organizuara të Seviljes. Nuk është shaka. Në një shkallë të bandave të hajdutëve, ata janë në nivelin 10”, pohon ajo.

Për më tepër, ajo tregon se interesi i tyre kryesor ishin bizhuteritë dhe sende të tjera të ngjashme.

“Ar, bizhuteri, orë, diamante... Kanë marrë një kuti bizhuterish që kisha me bizhuteri Pandora dhe kanë kërkuar nëpër sirtarë dhe kanë marrë bizhuteri të tjera”.