Champions League është trofeu më i lakmuar në futbollin europian, por edhe disa prej legjendave më të mëdha të këtij sporti nuk kanë arritur ta fitojnë kurrë. Ronaldo Nazário, Zlatan Ibrahimović, Gianluigi Buffon, Francesco Totti dhe Pavel Nedved janë vetëm disa prej emrave të mëdhenj që e kanë mbyllur karrierën pa trofeun e Champions League në vitrinat e tyre.

Roberto Baggio

Italiani, i cili luajti për Interin, Milanin dhe Juventusin, fitoi Topin e Artë në vitin 1993, dy tituj kampionë dhe një Kupë UEFA. Në Champions League, megjithatë, ai luajti vetëm 11 ndeshje, duke shënuar pesë gola. Faza çerekfinale me Interin në vitin 1999 ishte pika më e largët ku arriti.

Ronaldo Nazário

‘Fenomeni’ brazilian fitoi shumë trofe, përfshirë dy kampionate, dy Superkupa të Spanjës, dy Superkupa të Europës, Kupën Interkontinentale, Kupën e Mbretit dhe Kupën UEFA. Por Champions League i mungoi. Në 42 ndeshje shënoi 16 gola dhe dha 10 asistime. Me Real Madridin arriti deri në gjysmëfinale në vitin 2003, ku u eliminua nga Juventusi.

Zlatan Ibrahimović

Suedezi luajti në katër nga pesë ligat e mëdha europiane dhe fitoi tituj në Spanjë, Francë dhe Holandë. Ai fitoi edhe Europa League-n me Manchester United, por Champions League i shpëtoi gjithmonë. Me Barcelonën arriti deri në gjysmëfinale në vitin 2010, ku katalanasit u eliminuan nga Interi.

Gianluigi Buffon

Portieri italian është një prej rasteve më të dhimbshme. Buffon humbi tri finale të Champions League me Juventusin: në vitin 2003 ndaj Milanit pas penalltive, në 2015 ndaj Barcelonës dhe në 2017 ndaj Real Madridit.

Cesc Fàbregas

Spanjolli iu afrua trofeut në vitin 2006, kur Arsenali arriti në finale, por humbi ndaj Barcelonës. Më pas Fàbregas luajti edhe për Barcelonën dhe Chelsea-n, por nuk arriti ta fitonte Champions League.

Ruud van Nistelrooy

Holandezi ishte një makinë golash dhe madje u shpall golashënuesi më i mirë i Champions League në disa sezone. Me Manchester United shënoi 10 gola në 2002, 12 në 2003 dhe tetë në 2005. Gjysmëfinalja e vitit 2002, ku Unitedi u eliminua nga Bayer Leverkusen, ishte arritja e tij më e madhe në kompeticion.

Francesco Totti

Legjenda e Romës, një prej shembujve më të mëdhenj të besnikërisë ndaj një klubi, fitoi një titull kampion, dy Kupa të Italisë dhe dy Superkupa. Në Europë, megjithatë, nuk shkoi përtej çerekfinaleve të Champions League, ku Roma u eliminua nga Manchester United në vitet 2007 dhe 2008.

Michael Ballack

Gjermani humbi dy finale të Champions League. E para ishte në vitin 2002 me Bayer Leverkusenin ndaj Real Madridit, ndërsa e dyta në vitin 2008 me Chelsea-n ndaj Manchester United. Në total, Ballack luajti 86 ndeshje në Champions League, duke shënuar 16 gola dhe dhënë 12 asistime.

Pavel Nedved

Fituesi i Topit të Artë në vitin 2003 nuk mundi të luante në finalen e Champions League atë vit, pasi ishte i pezulluar. Juventusi humbi ndaj Milanit pas penalltive. Nedved zhvilloi 78 ndeshje në Champions League, me 15 gola dhe 15 asistime.

Dennis Bergkamp

Legjenda holandeze e Arsenalit fitoi tre tituj të Premier League, por nuk e ngriti kurrë Champions League. Frika nga fluturimi ndikoi që ai të mos luante më shumë ndeshje në kompeticion. Në total, Bergkamp zhvilloi 40 ndeshje në Champions League, duke shënuar shtatë gola dhe dhënë gjashtë asistime.