Korsitë e lëvizjes në të dyja drejtimet e aksit Tiranë-Durrës do të bllokohen përkohësisht gjatë tri netëve të para të shtatorit, për shkak të punimeve në mbikalimin e ri të Kasharit.
Sipas Autoritetit Rrugor Shqiptar, kufizimet do të jenë në fuqi në datat 1, 2 dhe 3 shtator 2026, nga ora 23:00 deri në 05:00.
Gjatë kësaj periudhe do të kryhen punime për montimin e trarëve metalikë në hapësirën qendrore të mbikalimit, në kuadër të projektit “Zgjerimi i Superstradës Tiranë-Durrës (Faza III)”.
Për të garantuar vijimin e qarkullimit, mjetet do të orientohen drejt rrugëve dytësore dhe akseve alternative.
Në drejtimin Tiranë-Durrës, automjetet do të devijohen përmes rampës provizore në drejtim të Rinasit dhe do të vijojnë në rrugën dytësore. Rikthimi në autostradë do të bëhet nëpërmjet rrugës së Rinasit dhe rampës përkatëse në drejtim të Durrësit.
Mjetet e rënda, veçanërisht kamionët, do të devijohen që në nyjen “Casa Italia” dhe do të vijojnë lëvizjen përmes rrugës dytësore.
Në drejtimin Durrës-Tiranë, automjetet do të devijohen nëpërmjet mbikalimit Kashar-Thumanë, duke vijuar në rrugën dytësore në anën e majtë. Mjetet do të rikthehen në autostradë pasi të kalojnë mbikalimin e Kasharit.
Ndërkohë, mjetet me destinacion Rinasin, Shkodrën dhe Kosovën do të orientohen që në mbikalimin e autostradës Kashar-Thumanë për të vijuar më tej në drejtimin përkatës.
NJOFTIMI:
Në kuadër të vijimit të punimeve për realizimin e projektit “Zgjerimi i Superstradës Tiranë–Durrës (Faza III)”, dhe në zbatim të Planit të Menaxhimit të Trafikut, do të kryhen punime për montimin e trarëve metalikë në hapësirën qendrore të mbikalimit të ri të Kasharit.
Për realizimin e sigurt të këtyre punimeve, në datat 1, 2 dhe 3 shtator 2026, në intervalin kohor 23:00–05:00, do të ketë bllokim të përkohshëm të korsive të lëvizjes në të dyja drejtimet e aksit kryesor Tiranë–Durrës dhe Durrës–Tiranë.
Gjatë këtij intervali kohor, qarkullimi i mjeteve do të menaxhohet dhe devijohet sipas skemës së mëposhtme:
• Drejtimi Tiranë–Durrës
Mjetet do të devijohen nëpërmjet rampës provizore në drejtim të Rinasit dhe do të vijojnë lëvizjen në rrugën dytësore. Rikthimi në autostradë do të bëhet nëpërmjet rrugës së Rinasit dhe rampës përkatëse në drejtim të Durrësit.
• Mjetet e rënda, veçanërisht kamionë
Për shkak të karakteristikave të qarkullimit dhe punimeve që do të kryhen, mjetet e rënda do të devijohen që nga nyja “Casa Italia”, duke vijuar nëpërmjet rrugës dytësore.
• Drejtimi Durrës–Tiranë
Mjetet do të devijohen nëpërmjet mbikalimit Kashar–Thumanë, duke vijuar në rrugën dytësore në anën e majtë, deri pas mbikalimit të Kasharit, nga ku do të rikthehen në autostradë.
• Mjetet me destinacion Rinasin, Shkodrën dhe Kosovën
Këto mjete do të sinjalizohen dhe orientohen që në mbikalimin e autostradës Kashar–Thumanë, për të vijuar më tej në drejtimin përkatës.
Gjatë gjithë periudhës së ndërhyrjes do të jetë e pranishme sinjalistika e përkohshme rrugore, ndërsa drejtuesit e mjeteve janë të lutur të ndjekin me përpikëri sinjalizimin dhe udhëzimet e personelit të angazhuar për menaxhimin e trafikut.
ARRSH kërkon mirëkuptimin dhe bashkëpunimin e drejtuesve të mjeteve, bizneseve dhe banorëve të zonës për kufizimet e përkohshme të qarkullimit.
U rekomandohet drejtuesve të mjeteve të planifikojnë paraprakisht itinerarin e tyre dhe të shmangin, sa të jetë e mundur, qarkullimin në këtë segment gjatë intervalit kohor të punimeve
