Dy drejtues të Bashkisë Tropojë janë ndaluar nga policia, pas ngjarjes së rëndë të ndodhur një ditë më parë në afërsi të fshatit Bujan, ku një punonjës humbi jetën dhe tre të tjerë u plagosën pasi ranë në kontakt me rrymën elektrike.
Policia bën me dije se, në kuadër të hetimeve, shërbimet e Komisariatit të Policisë Tropojë kanë ndaluar për veprën penale “Shkelja e rregullave të mbrojtjes në punë” dy persona: Ndriçim Gjocaj, 36 vjeç, me detyrë Drejtor i Drejtorisë së Turizmit, Shërbimeve Publike dhe Transportit, dhe Gëzim Hasanpapaj, 60 vjeç, me detyrë Drejtues Teknik i punimeve.
Të dy personat janë banues në Bajram Curri.
Si ndodhi ngjarja
Sipas të dhënave të deritanishme të hetimit, katër punonjës të Sektorit të Shërbimeve të Bashkisë Tropojë po punonin për vendosjen e një shtylle ndriçimi në bazament.
Gjatë procesit, punonjësit dyshohet se kanë humbur ekuilibrin, duke bërë që shtylla të binte në kontakt me telat elektrikë. Rryma është përcjellë më pas te katër punonjësit.
Si pasojë e kontaktit me energjinë elektrike, M. S. humbi jetën, ndërsa tre punonjësit e tjerë, A. D., I. D. dhe A. A., u dëmtuan dhe u transportuan për ndihmë mjekësore.
Sipas policisë, tre të plagosurit ndodhen jashtë rrezikut për jetën.
