Ekzekutim makabër/ U gjet i lidhur në makinën e fundosur, mediat: Dyshohet se viktima është shqiptar

Një person gjendet i pajetë në Itali, i lidhur, brenda makinës së fundosur. Hetimet po zhvillohen për vrasje, viktima dyshohet se është shqiptar

LA VOCE DI ROVIGO

Kamera, verifikime mbi Fiat Bravo-n dhe të dhënat e telefonatave: hetimet për vrasjen e personit të gjetur të pajetë brenda makinës së nxjerrë nga ujërat pranë digës së Torre di Burri në Padova, vazhdojnë.

Viktima, e moshës ndërmjet 45 dhe 55 vjeç, ende nuk është identifikuar zyrtarisht, megjithëse sipas informacioneve të para mund të jetë me origjinë shqiptare.

Gjatë gjithë pasdites, karabinierët shqyrtuan regjistrimet e kamerave të një zdrukthëtarie që ndodhet përballë vendit ku u gjet automjeti. Njëra prej kamerave, e vendosur jashtë kapanonit, regjistron pjesërisht edhe trafikun përgjatë rrugës. Pamjet u morën dhe u shqyrtuan duke u kthyer edhe te ditët e mëparshme, por deri tani nuk kanë dhënë elemente të dobishme për të përcaktuar se kur dhe nga kush Fiat Bravo u dërgua drejt digës.

Makina, e gjetur pa të dyja targat, dyshohet se është shtyrë në ujëra në pikën e bashkimit të Tergolës me Vandurën. Hetuesit po analizojnë tani edhe pamjet e kamerave të vëzhgimit të komunës në Via del Santo dhe ato të sistemeve të pranishme në zonën e digës, në përpjekje për të rindërtuar itinerarin e automjetit.

Ndër hipotezat e hetimit është edhe ajo se personi, ose personat që e braktisën makinën, mund të kenë pasur ndihmën e të paktën një bashkëpunëtori për t’u larguar nga zona.

Verifikime teknike do të kryhen edhe mbi Fiat Bravo-n. Në kabinë do të kërkohen gjurmë të mundshme gjaku ose elemente të tjera biologjike që mund të sqarojnë nëse viktima është vrarë brenda makinës apo në një vend tjetër dhe më pas është futur në automjet. Sediljet e pasme u gjetën të ulura dhe burri i kishte duart të lidhura.

Një rol qendror do të ketë autopsia. Ekzaminimi duhet të përcaktojë shkaqet dhe kohën e vdekjes dhe të verifikojë, në veçanti, praninë e mundshme të ujit në mushkëri. Hipoteza që po merret më shumë në konsideratë është se personi kishte vdekur tashmë kur makina përfundoi në kanal, por do të jenë ekzaminimet mjeko-ligjore ato që do të japin përgjigjet.

Ndërkohë, zhytësit e zjarrfikësve do të rikthehen në ujërat përreth digës së Torre di Burri. Kërkimet e para nuk kanë dhënë elemente të dobishme; ndër gjërat që po kërkohen në fund të ujit mund të jetë edhe arma e përdorur për vrasjen.

Në fund, hetuesit synojnë të marrin të dhënat e telefonave celularë që janë lidhur me antenat e zonës gjatë ditëve që përkojnë me periudhën kur automjeti mund të jetë braktisur, me qëllim identifikimin e personave të pranishëm që mund të ndihmojnë në rindërtimin e lëvizjeve përreth digës.