Gazetarja Klodiana Lala ka zbardhur të tjera detaje nga aksioni i fundit i SPAK, ku janë sekuestruar pasuri të reja. Sipas Lalës, ka dyshime se këto pasuri i përkasin në mënyrë të tërthortë, ish numrit dy të qeverisë, Belinda Balluku.
Më herët janë sekuestruar dhe pasuri të tjera në këtë zonë, ndërsa Lala thotë se provat janë gjetur dhe në disa celularë.
“SPAK ka sekuestruar pasuri në zonën e Palasës. Ato dyshohet se zotërohen në mënyrë të tërthortë nga Balluku. Vendimi është firmosur nga gjyqtari Erion Çela. SPAK nuk ka dhënë shpjegime për pasuritë e sekuestruara dhe se si është certifikuar që këto pasuri disponohen në mënyrë të tërthortë nga Balluku. Më herët janë sekuestruar dhe pasuri të tjera në këtë zonë. Provat janë gjetur dhe në disa celularë. Oficerë të BKH janë duke bërë sekuestrim të pasurive që më pas do të bllokohen. SPAK është duke hetuar Ballukun për korrupsion, për Tunelin e Llogarasë dhe për Unazën e re. SPAK më herët sekuestroi një vilë luksoze në Dhërmi që dyshohet se i përket Ballukut. Deri më tani nuk ka informacione nëse do të ketë një kërkesë të re për arrestimin e Ballukut, ndërsa zoti Braho nuk e ka përjashtuar. Në hetime janë dhe disa biznesmen që dyshohet se bashkëpunonin me Ballukun për fshehje pasurie. Vila në fjalë dyshohet se është bërë nga Balluku gjatë kohës që punonte në Albcontrol.”, tha Lala për News24.
