Pronat e sekuestruara, 180 milionë lekë të ardhura nga qiratë

Të ardhurat nga qiratë e pronave të sekuestruara dhe të konfiskuara janë rritur ndjeshëm këtë vit. Në tetë muaj, shteti ka arkëtuar rreth 180 milionë lekë, 30% më shumë se një vit më parë.

Shteti ka rritur ndjeshëm të ardhurat nga dhënia me qira e pasurive të sekuestruara dhe të konfiskuara. Të dhënat e Agjencisë që administron këto prona tregojnë se gjatë periudhës janar-gusht 2026 janë arkëtuar rreth 180.3 milionë lekë, ose afërsisht 1.8 milionë euro.

Krahasuar me të njëjtën periudhë të vitit të kaluar, të ardhurat janë rritur me rreth 41 milionë lekë, ose 30%.

Kjo tregon se pasuritë që kalojnë nën administrimin e shtetit po përdoren gjithnjë e më shumë si një burim të ardhurash, në vend që të mbeten të papërdorura gjatë proceseve gjyqësore apo procedurave të tjera ligjore.

Rritja është shfaqur në pjesën më të madhe të muajve të vitit. Në janar të ardhurat nga qiratë arritën në rreth 19 milionë lekë, ndërsa në shkurt u ngjitën në 22 milionë.  Tendenca pozitive vijoi edhe në qershor, me 23 milionë lekë të ardhura.

Në aspektin ekonomik, rritja tregon një përpjekje për t’i kthyer pasuritë e sekuestruara dhe të konfiskuara në aktivitete që gjenerojnë të ardhura.

Kjo qasje ka një rëndësi për financat publike pasi shteti siguron të ardhura duke shmangur kostot nga humbjet që mund të krijohen nëse këto prona qëndrojnë të mbyllura.