Bayerni i Mynohit nis rrugëtimin në Champions League me objektivin e qartë për të shkuar deri në fund. Bavarezët presin në shtëpi Bodø/Glimt, një prej surprizave më të mëdha të edicionit të kaluar, dhe synojnë ta nisin aventurën europiane me një fitore.

Skuadra e Vincent Kompany vjen në këtë përballje e pamposhtur në kampionatin vendas këtë sezon, me tri fitore dhe një barazim. Bayerni do të luajë edicionin e 43-të në historinë e tij në këtë kompeticion dhe pritshmëritë janë të mëdha, sidomos pas arritjes në gjysmëfinale sezonin e kaluar.

Në fundjavë, bavarezët u ndalën nga Schalke, duke mos shënuar për herë të parë pas 59 ndeshjesh në të gjitha kompeticionet. Megjithatë, rekordi në shtëpi në Champions është impresionues. Bayerni nuk ka humbur në fazën e grupeve apo të ligës në shtëpi që prej vitit 2013, kur u mposht nga Manchester City. Që atëherë, ka regjistruar 36 fitore dhe dy barazime.

Pavarësisht diferencës në emër dhe histori, Bodø/Glimt nuk është kundërshtar për t’u nënvlerësuar. Norvegjezët arritën deri në 1/8-at sezonin e kaluar, pasi mposhtën Manchester Cityn dhe Atlético Madridin në fazën e ligës, përpara se të eliminonin Interin në play-off-et me eliminim direkt.

Një nga protagonistët kryesorë është Jens Petter Hauge, i cili shënoi gjashtë gola në Champions sezonin e kaluar, një rekord për një klub norvegjez në një edicion të vetëm të kompeticionit.

Në përballjen e parë historike mes dy skuadrave, vëmendja do të jetë edhe tek Harry Kane. Sulmuesi anglez realizoi 14 gola në Champions sezonin e kaluar dhe kërkon të nisë menjëherë një tjetër sezon të madh europian. Bayerni do të ketë mungesë Serge Gnabry-n, ndërsa Bodø/Glimt nuk do të ketë në dispozicion Haitam Aleesamin dhe Håkon Evjen.

Statistikat favorizojnë Bayern: bavarezët kanë fituar ndeshjen hapëse të 23 edicioneve të fundit europiane, ndërsa Bodø/Glimt ka shënuar të paktën dy gola në 11 nga 12 ndeshjet e fundit europiane.