Një klinikë dentare ka denoncuar problemet e përsëritura me shërbimin e telefonisë ndërkombëtare të operatorit One Albania, (nën drejtimin e Barna Kútvölgyi dhe grupit hungarez 4iG).
Sipas denoncimit të publikuar nga JOQ, klinika ka investuar rreth 200 mijë euro në marketing me synim tërheqjen e pacientëve nga jashtë vendit. Megjithatë, prej muajit maj, telefonatat ndërkombëtare raportohet se nuk funksionojnë siç duhet.
Sipas denoncimit, në disa raste pacientëve u shfaqen numra të huaj, gjë që krijon pasiguri dhe mosbesim, ndërsa në raste të tjera telefonatat dyshohet se lidhen gabimisht me restorante apo agjenci udhëtimi.
Klinika pretendon se situata ka sjellë humbje të kontakteve me pacientët potencialë, mundësi të humbura për trajtime dhe pasoja në reputacion, veçanërisht për shkak të natyrës së aktivitetit dhe faktit se një pjesë e konsiderueshme e klientelës synohet të vijë nga jashtë Shqipërisë.
Sipas denoncimit, për shkak të problemeve të përsëritura, klinika i është drejtuar zyrtarisht operatorit duke kërkuar edhe prishjen e kontratës.
Deri në publikimin e këtij raportimi, bëhet me dije se nuk ka pasur një reagim zyrtar nga kompania lidhur me pretendimet e klinikës.
