Shqipëria mund të shndërrohet në një nyje të rëndësishme të furnizimit me gaz për Ballkanin Perëndimor dhe Europën Juglindore. Qeveria shqiptare dhe kompania amerikane Argent LNG kanë nënshkruar një memorandum mirëkuptimi për të shqyrtuar ndërtimin e një terminali të gazit natyror të lëngshëm në bregdetin shqiptar.
Projekti parashikon një kapacitet rigazifikimi deri në 5 milionë tonë LNG në vit, ndërsa terminali do të shërbente jo vetëm tregun shqiptar, por kryesisht vendet e rajonit. Sipas planit paraprak, terminali mund të lidhet me gazsjellësin TAP, projektin e gazsjellësit Jonian-Adriatik dhe korridorin Fier-Vlorë, duke krijuar një rrugë të re për shpërndarjen e gazit në rajon. Ambicia shkon edhe përtej Ballkanit.
Argent LNG parashikon që infrastruktura në Shqipëri të mund të përdoret në të ardhmen edhe për furnizimin e Ukrainës, përmes rrjeteve dhe marrëveshjeve rajonale të gazit. Megjithatë, projekti është ende në fazë vlerësimi. Memorandumi nuk përbën angazhim përfundimtar për financimin apo ndërtimin e terminalit dhe palët pritet të analizojnë vendndodhjen, fizibilitetin, lidhjet teknike dhe mënyrën e financimit.
Sondazh
Lexo gjithashtu
