Një debat i fortë është zhvilluar mes gazetarit Lavdrim Lita dhe deputetes socialiste Aulona Bylykbashi lidhur me vonesat në zbatimin e vendimit të Gjykatës Kushtetuese për pagat e gjyqtarëve dhe prokurorëve.
I ftuar në emisionin “Off the Record” të Andrea Dangllit në A2CNN, Lita vuri në pikëpyetje mënyrën se si qeveria dhe mazhoranca kanë vepruar prej muajsh, ndërsa vendimi i Gjykatës Kushtetuese, sipas tij, daton më 16 shkurt 2026.
Gazetari kërkoi llogari për arsyen pse zbatimi i vendimit është zvarritur për disa muaj, duke përmendur edhe shpenzimet e qeverisë për koncertin e Kanye West.
“Vendimi i Gjykatës Kushtetuese është me 16 shkurt të 2026. Shkurt, mars, prill, maj, qershor, korrik, gusht, shtator, çfarë ka bërë qeveria? Çfarë ka bërë mazhoranca? Çfarë ka bërë ministri i Drejtësisë që s’paska parë vendimin e Gjykatës Kushtetuese?!”, deklaroi Lita.
Më tej, gazetari e lidhi vonesën me shumën prej 4.2 milionë eurosh që, sipas tij, iu dha këngëtarit amerikan Kanye West për koncertin në Tiranë.
“Në korrik është marrë një muaj me koncertin e Kanye West! Paska qenë më i rëndësishëm koncerti i Kanye West, 4,2 milionë euro këngëtarit amerikan që këndoi dy orë dhe iku, dhe s’po bëjmë vendimin e gjyqtarëve dhe prokurorëve”, tha ai.
Lita argumentoi se bëhet fjalë për një vendim të Gjykatës Kushtetuese që duhet zbatuar dhe jo të mbetet për muaj të tërë në pritje.
“Nuk merret një vendim i GJK për t’u shqyrtuar për 6 muaj! Çfarë bën ky Toni Gogu?! Çfarë bën Parlamenti dhe qeveria?!”, u shpreh gazetari.
Në vijim, ai e ashpërsoi akuzën duke vënë përballë fondet e shpenzuara për koncertin dhe detyrimin për të garantuar pagat e magjistratëve.
“I kanë dhënë 4,2 milionë West-it dhe s’kanë për t’ua dhënë gjyqtarëve dhe prokurorëve që mbajnë shtetin në këmbë. Kujt ia hedhin këta?!”, përfundoi Lita.
