Eksperti i kriminalistikës, Fatjon Softa, ka ngritur shqetësimin për përshkallëzimin e konflikteve që nisin në rrjetet sociale, duke paralajmëruar se përplasjet virtuale po kalojnë gjithnjë e më shpesh në dhunë reale.
I ftuar në studion e Euronews, në një intervistë me gazetaren Mirela Milori, Softa u ndal edhe te rastet kur në konflikte përfshihen persona të njohur apo VIP-a, të cilët, sipas tij, në disa raste i bëjnë publikisht kërcënimet në rrjetet sociale.
Sipas ekspertit, një debat që nis me fyerje apo presion në internet mund të përfundojë në përplasje fizike dhe, në rastet më të rënda, edhe në përdorimin e armëve apo mjeteve të forta.
Softa tha se problematik është edhe fakti që dhuna dhe përplasjet publikohen më pas në rrjetet sociale, duke krijuar një lloj modeli që mund të nxisë të tjerë të veprojnë në të njëjtën mënyrë.
“Zgjidhja më e lehtë për këto konflikte është kthyer përdorimi i forcës”, u shpreh ai, duke shtuar se kjo sjellje po merr përmasa shqetësuese.
Eksperti theksoi se fenomeni nuk kufizohet vetëm te të rriturit, por po shfaqet edhe te moshat e reja.
“Kjo po ndodh që nga fëmijët”, deklaroi Softa, duke paralajmëruar për pasojat e përshkallëzimit të konflikteve që nisin në hapësirën virtuale dhe përfundojnë në jetën reale.
