Kombëtarja e Italisë duket se do të duhet të heqë dorë nga një tjetër objektiv për repartin ofensiv. Sulmuesi 22-vjeçar Nicolò Tresoldi nuk pritet t’i bashkohet “Azzurrëve”, pavarësisht përpjekjeve të trajnerit Roberto Mancini për ta bindur.

Tekniku italian kishte tentuar të përfshinte në projektin e tij të ri futbollistin e Club Brugge, por sipas raportimeve, Tresoldi ka vendosur të vazhdojë të përfaqësojë Gjermaninë.

Vendimi përbën një ndryshim nga qëndrimi i shfaqur prej tij gjatë javëve të fundit, kur sulmuesi ishte treguar i hapur ndaj mundësisë për të veshur fanellën e Italisë.

Tresoldi ka lindur në Cagliari, por është rritur në Gjermani. Në vitin 2022 ai mori edhe shtetësinë gjermane dhe prej atëherë ka ndjekur rrugëtimin e tij në ekipet kombëtare të moshave të këtij vendi.

Sulmuesi ka qenë prej vitesh një prej elementëve të rëndësishëm të Gjermanisë në nivelet e të rinjve dhe ishte pranë një grumbullimi me ekipin e parë për Botërorin e fundit, nën drejtimin e Julian Nagelsmann.

Në këto kushte, Tresoldi nuk duket se dëshiron t’i kthejë shpinën Gjermanisë, federatës që e ka mbështetur dhe ndjekur zhvillimin e tij gjatë gjithë këtyre viteve.

Një tjetër faktor i rëndësishëm është edhe Kampionati Europian U-21, që do të zhvillohet verën e ardhshme. Tresoldi synon të jetë pjesë e Gjermanisë në këtë turne, ku pritet të ketë një rol të rëndësishëm.

Për Italinë, kjo do të thotë se Mancini duhet të kthejë vëmendjen tek alternativa të tjera për sulmin dhe të kërkojë talente të rinj që mund t’i shërbejnë projektit të tij.