Hitaj: Bashkimi i Ministrisë së Brendshme me pushtetin vendor, strategji e Ramës për zgjedhjet

Gazetari Arbër Hitaj komentoi në emisionin “Review” në Euronews Albania vendimin e kryeministrit Edi Rama për bashkimin e Ministrisë së Brendshme me atë të Pushtetit Vendor.

Sipas Hitajt, ky vendim lidhet me një strategji të kryeministrit për zgjedhjet e ardhshme lokale. Ai argumentoi se fakti që pushteti vendor i është bashkuar Ministrisë së Brendshme tregon rëndësinë që Rama u kushton bashkive dhe kontrollit të territorit.

“Fakti që e ka çuar te Ministria e Brendshme dhe pushteti vendor tregon se Rama ka një siklet me bashkitë, ndaj po çon në një njeri që e njeh shumë mirë këtë fushë”, u shpreh Hitaj.

Gazetari e cilësoi këtë lëvizje si një përpjekje për të krijuar një “arkitekt” të fushatës për zgjedhjet lokale, duke theksuar se një pjesë e rëndësishme e procesit zgjedhor lidhet edhe me Ministrinë e Brendshme.

“Për të qenë arkitekt i fitores në zgjedhjet lokale, pjesa më e rëndësishme e zgjedhjeve kalon nga Ministria e Brendshme. I ka dhënë një barrë shumë të madhe, por projeksioni janë zgjedhjet e 2027”, tha ai.

Sipas Hitajt, ndryshimi institucional mund të jetë gjithashtu rezultat i një vlerësimi të brendshëm politik brenda Partisë Socialiste.

“Të gjithë lëvizjet lidhen me ndonjë sondazh të brendshëm që Ramës nuk i ka dalë mirë. Ka një pakënaqësi të madhe dhe kjo e bën Ramën të krijojë një superministri”, deklaroi gazetari.