Rama në Gjirokastër, takim me strukturat socialiste për reformën territoriale

Kryeministri Edi Rama do të jetë sot në Gjirokastër, ku do të zhvillojë një takim me strukturat e Partisë Socialiste në kuadër të diskutimeve për reformën e re territoriale.

Takimi pritet të zhvillohet në orën 12:00 në ambientet e teatrit “Zihni Sako”, ku Rama do të bashkëbisedojë me strukturat socialiste të bashkive që, në reformën e re territoriale do t’i bashkohen bashkive të tjera si Memaliaj, Këlcyra dhe Libohova.

Pas Gjirokastrës, kryeministri pritet të vijojë axhendën e tij edhe në Vlorë, ku gjatë pasdites ka planifikuar disa takime dhe ndalesa.

Në Vlorë, Rama pritet të zhvillojë rreth orës 16:00 një bashkëbisedim me qytetarët në Pallatin e Kulturës, ku reforma territoriale do të jetë gjithashtu në fokus. Më pas, axhenda e tij parashikon ndalesa në Lungomare dhe në ish-Parkun Aulona.

Kryeministri pritet të prezantojë një prej projekteve të parashikuara për transformimin e hapësirës në një zonë çlodhëse dhe kreative për qytetarët dhe vizitorët.

Axhenda e Ramës në jug të vendit pritet të përmbyllet me një ndalesë në territorin e Bashkisë Selenicë, ku gjithashtu janë parashikuar takime.