Situata e zjarreve në vend paraqitet e përmirësuar. Gjatë 24 orëve të fundit janë raportuar gjithsej 32 vatra zjarri, nga të cilat 28 janë shuar plotësisht, 3 vijojnë të jenë nën mbikëqyrje, ndërsa vetëm një vatër mbetet aktive.
Sipas Ministrisë së Mbrojtjes, vatra aktive ndodhet në fshatin Gallatë, në njësinë administrative Milot, Bashkia Kurbin. Zjarri ka ardhur nga territori i Bashkisë Mat, ndërsa terreni i vështirë ka penguar ndërhyrjen me mjete. Megjithatë, autoritetet bëjnë me dije se nuk ka rrezik për zonat e banuara.
Vatrat nën monitorim
Në Qarkun Tiranë janë shuar zjarret në Malin e Dajtit dhe Malin me Gropa. Ndërkohë, në Qarkun Dibër vijojnë të monitorohen vatrat në Lundre–Madhesh, Cerrujë dhe Selishtë, pa paraqitur rrezik për banesat.
Në Qarkun Shkodër janë shuar vatrat në Porav, Rragam dhe malin e Tërbunit. Po ashtu, janë shuar zjarret e raportuara në qarqet Fier, Mallakastër, Elbasan dhe Korçë.
Mbi 500 forca të angazhuara në operacione
Në operacionet për përballimin e situatës janë angazhuar 426 forca operacionale vendore dhe lokale, së bashku me 30 automjete zjarrfikëse.
Forcat e Armatosura kanë mbështetur operacionet me 92 efektivë, 10 mjete, një dron dhe një autoambulancë.
Agjencia Kombëtare e Mbrojtjes Civile vijon monitorimin e situatës në të gjithë territorin, në koordinim me prefekturat, bashkitë dhe strukturat e sistemit të Mbrojtjes Civile.
Autoritetet deklarojnë se kapacitetet operacionale mbeten në terren dhe në gatishmëri për të ndërhyrë në rast nevoje, me prioritet mbrojtjen e jetës, banesave dhe pasurisë së qytetarëve.
