Detaje të reja janë zbuluar nga operacioni “Lulet e së keqes” të zhvilluar në Greqi, ku u sekuestruan 84 kg kokainë ...
POLITIKE
Rama ‘nuk iu ndahet’ pagave të gjyqtarëve: E rritën 2000 euro më shumë se kolegët në Greqi dhe 3 mijë më shumë se në Malin e Zi
PiranjatPërditësimi i fundit 13 Shtator 2026, 09:56
Kryeministri Edi Rama ka shprehur sërish kundërshtinë e tij në ‘X’, në lidhje me pagat e reja që magjistratët miratuan, duke bërë një krahasim me vendet fqinje, Greqinë dhe Malin e Zi.
‘’Një gjykatës fillestar sot në Shqipëri merr 500 Euro pagë më të lartë se sa kolegu në Greqi dhe me vendimin e marrë vetë Zot vetë Shkop, paga duhet të rritet 2000 Euro më shumë në muaj se sa kolegu grek dhe 3000 Euro më shumë se sa kolegu në Malin e Zi’’, shkruan Rama.
Në tabelën e publikuar nga Rama, Shqipëria renditet aktualisht e dyta në rajon për pagën mujore bruto të gjyqtarëve fillestarë, me 3241 euro, pas Rumanisë me 3665 euro.
Sipas të dhënave të paraqitura, nëse paga e gjyqtarëve në Shqipëri rritet në 4 886 euro, vendi do të ngjitej në vendin e parë, me një rritje prej 50.8%. Pas Shqipërisë do të renditeshin Rumania, me 3665 euro dhe Sllovenia me 2842 euro.
Gushti dhe shtatori kanë qenë muaj ‘të nxehtë’ pas përplasjes mes magjistratëve dhe ekzekutivit. Këshilli i Lartë i Prokurorisë dhe Këshilli i Lartë Gjyqësor miratuan pagat e reja për veten, nisur kjo nga vendimi i Gjykatës Kushtetuese dhe vakanca ligjore e lënë bosh nga Kuvendi, teksa Ministria e Financave ka bllokuar në Thesar pagat për magjistratët dhe administratën e gjykatave dhe prokurorive.
Pas ‘mbylljes’ të pagave, Gjyqtarët kanë denoncuar në SPAK ministrin e Financave, Petrit Malaj, ndërsa Administrativja ka urdhëruar kalimin e pagave me formulën e re të miratuar nga KLP dhe KLGJ.
Bllokimi i pagave ka bërë që shumë gjykata në vend të bojkotojnë seancat në shenjë revolte.
