Nga Boldnews.al
Në dalje të sezonit turistik, bëri jo pak çudi përgjigja pozitive e ftesës së kryetarit të Gjykatës së Lartë Sokol Sadushi ndaj kryeministri të vendit Edi Rama në një “festë fshati” në Vajzë të Vlorës. Ai shkoi pas katër vitesh refuzim, duke lënë pas shenjën e dukshme se forca është mjeti që njohin më mirë, ku çekani i drejtësisë kalon edhe nga dora e pushtetit ekzekutiv.
Nuk ishin dy individë në “punë të ndryshme”, por dy pushtete të cilët asesi nuk mund të qëndrojnë bashkë, as në moral, as de jure. Dikush po i thërret të ulen edhe një herë me nge. Të diskutojnë me dashmirësi me emrin e tij në gojë.
Ky është Erion Veliaj, kryetari i Bashkisë Tiranë i cili mesin e këtij muaji e pret me shumë interes, duke shpresuar më shumë se kurrë për të mbyllur derën e qelisë, qoftë edhe përkohësisht.
Nesër në Gjykatën e Lartë do të shqyrtohet rasti i masës së sigurisë së Erion Veliajt, i cili kërkon ikjen nga burgu, duke iu referuar “punëve që pret bashkia në interes publik”, por edhe vendimi të unifikuar të Gjykatës së Lartë për shmangien sa më shumë të masave të sigurisë “arrest me burg pa afat”. Po kush ishte nismëtari i rishikimit të praktikave gjyqësore në vlerësimin e masave të sigurisë?
Kreu i Gjykatës së Lartë Sokol Sadushi do kthehej në heroin e zyrtarëve apo ish-zyrtarëve të lartë publik të prekur nga “lapsi Rama” me duart e SPAK.
Padyshim po me izmin e Ramës, Sadushi do gjente Zenelin në Lezhë për ta kthyer në “precedent” ku kolegjet e bashkuara të Gjykatës së Lartë të cilët vendosën “zbutjen” e masave të sigurisë, si për ata që janë aktualisht në këtë masë edhe të tjerët që do të përballen me drejtësinë.
Tashmë është koha që Sadushi të veshë edhe një herë shallin e kuq dhe të bëjë politikë të mirëfilltë duke shfrytëzuar “politikat juridike”. Dalja e mundshme e Veliajt nga qelia është më afër se kurrë. Por kujt do t’ia di për nder? Padyshim Edi Ramës dhe kryeministri nuk mund ta linte të ikte çështja e tij si “rast drejtësie rutinë”.
Ndikimi tek “Sadushët” e drejtësisë dhe shfaqja e tij si “Maliq” që ligjin e ka llasik po i jep frymë dhe i hap derën e qelisë çirakut që kurrë nuk u bë usta. Pas një viti e gjysmë në qeli, i poshtëruar në çdo drejtim, Erion Veliaj sërish ia di për nder atij që e “ç’nderoi”…! Çunat e Vajzës tashmë e kanë vendosur nëse shitësi i fiqve që u bë kryetar Bashkie do të dalë ose jo nga burgu në një kohë që vendi zien nga protestat.
