E fundit!

21:06 Aktualitet

Plarent Ndreca dhe revolucioni i madh i Abetares

Plarent Ndreca ka zbuluar se ekziston një pushtet tjetër p...

Varrimi i Ratko Mlladiç/ Kurti: Serbia kaloi nga mohimi në adhurimin shtetëror të gjenocidit

8 Shtator 2026, 14:24, Kosova & Bota CNA

Varrimi i Ratko Mlladiç/ Kurti: Serbia kaloi nga mohimi në adhurimin

Kryeministri në detyrë i Kosovës, Albin Kurti, ka reaguar ndaj ceremonisë me nderime shtetërore të organizuar në Serbi për varrimin e Ratko Mlladiçit, ish-komandant i Ushtrisë së Republikës Sërpska, i dënuar me burgim të përjetshëm për gjenocid dhe krime lufte.

“Sllobodan Millosheviç është quajtur me të drejtë 'Kasap i Ballkanit' dhe ky kasap ka pasur shumë thika, por Ratko Mlladiq ishte sëpata e tij kryesore, të cilin e glorifikojnë tash Beogradi zyrtar”, shkroi Kurti në Facebook.

Në korrik të vitit 1995, forcat serbe të Bosnjës vranë më shumë se 8.000 burra dhe djem boshnjakë në Srebrenicë. Gjykatat ndërkombëtare e kanë cilësuar masakrën si gjenocid.

Kurti kritikoi mënyrën se si institucionet serbe e përcollën Mlladiçin, duke përmendur përdorimin e aeroplanit qeveritar, flamurit shtetëror, pjesëmarrjen e ushtrisë, ministrave, klerikëve dhe orkestrës.

“Nga varrimi i priftit serb Nikolaj Velimiroviç në maj 1991 e deri te varrimi i Ratko Mlladiçit në shtator 2026, Serbia organizon spektakle morbide për gjakderdhje të ardhshme", shkroi ai.

Sipas Kurtit, nderimet ndaj Mlladiqit përbëjnë një ndryshim në mënyrën e trajtimit të së kaluarës në Serbi.

“Dje mohimi ishte fjalë e pamjaftueshme. Serbia ka kaluar në adhurim shtetëror të gjenocidit”, shkroi Kurti.

Akt të turpit moral e politik e ka quajtur nderimin e figurës së Mlladiqit edhe ministri në detyrë i Punëve të Jashtme të Kosovës, Glauk Konjufca.

Sipas tij, nderimet ushtarake që ia bëri Serbia “përbëjnë një akt të glorifikimit institucional të një njeriu të dënuar për gjenocid.”

Ceremonia e varrimit të Mlladiqit u dënua edhe nga kryetarja e Komisionit Evropian, Ursula von der Leyen, dhe kryetari i Këshillit Evropian, Antonio Costa, të cilët i cilësuan pamjet nga Beogradi si “tronditëse”, ndërsa pjesëmarrjen e zyrtarëve të lartë serbë si “thellësisht për keqardhje”.

Mlladiç u varros më 7 shtator në Beograd, me nderime ushtarake dhe shtetërore. Ai vdiq më 27 gusht në Hagë, derisa po vuante dënimin me burgim të përjetshëm, ndërsa u varros në varrezat Topçider në Beograd.

Ceremonia e varrimit u shoqërua me të shtëna nderi dhe fjalime lamtumire, në të cilat u madhërua e kaluara e tij gjatë luftës.

Përkujtimi, shërbesa fetare dhe varrimi në Beograd u shoqëruan me paralajmërime nga Bashkimi Evropian dhe Shtetet e Bashkuara të Amerikës se madhërimi i kriminelëve të dënuar të luftës është i papranueshëm. /REL