Presidenti amerikan Donald Trump ka deklaruar se Irani nuk do të ketë armë bërthamore, duke pretenduar se Teherani ishte shumë pranë sigurimit të një të tillë, por tashmë nuk ka më mundësi për ta realizuar këtë objektiv.
Deklaratat u bënë gjatë një aktiviteti përkujtimor të 11 Shtatorit në Uashington, ku Trump foli edhe për përplasjen e vazhdueshme me Iranin.
“Po luftojmë tani sepse kemi një shtet të caktuar që donte një armë bërthamore”, tha presidenti amerikan, duke iu referuar Iranit.
Sipas Trumpit, Teherani ishte “shumë pranë” sigurimit të armës bërthamore, por situata tashmë ka ndryshuar.
“Dhe tani ata nuk kanë asnjë shans për ta marrë atë. Irani nuk do të ketë armë bërthamore”, deklaroi ai.
Parandalimi i Iranit nga zhvillimi i armëve bërthamore ka qenë një prej argumenteve kryesore të administratës Trump për qëndrimin e saj ndaj Teheranit dhe veprimet ushtarake të ndërmarra kundër tij.
Trump e ka përsëritur në mënyrë të vazhdueshme se Irani nuk duhet të lejohet të posedojë armë bërthamore, duke e cilësuar këtë si një prej objektivave kryesore të politikës amerikane ndaj vendit.
Megjithatë, në deklaratat e fundit, presidenti amerikan nuk dha detaje konkrete apo prova të reja që do të mbështesnin pretendimin se Irani tashmë nuk ka më mundësi të zhvillojë një armë të tillë.
Çështja e programit bërthamor iranian vijon të jetë një prej pikave kryesore të tensionit mes Uashingtonit dhe Teheranit, ndërsa marrëdhëniet mes dy vendeve mbeten të tensionuara.