Pa partitë opozitare, formohet Qeveria “Kurti 4”. Kush janë anëtarët e kabinetit

Kuvendi i Kosovës ka votuar Qeverinë e re, të udhëhequr nga Albin Kurti, duke shënuar nisjen e mandatit të katërt të tij si kryeministër. Qeveria mori mbështetjen e shumicës së deputetëve të pranishëm, me 62 vota për, tetë kundër dhe asnjë abstenim.

Para votimit, kryeministri Kurti prezantoi ekspozenë e Qeverisë së re, duke përmendur arritjet e mandatit të kaluar në ekonomi, masat sociale dhe mbështetjen për sektorë të ndryshëm.

Kurti foli edhe për proceset gjyqësore ndaj ish-krerëve të UÇK-së në Hagë, duke deklaruar se këto ditë pritet me ankth verdikti që do të jepet ndaj katërshes së UÇK-së.

Në seancën ku u votua Qeveria e re nuk ishin të pranishëm deputetët e PDK-së, LDK-së dhe Aleancës. Në sallë ishin vetëm deputetët e Lëvizjes Vetëvendosje, Listës Serbe dhe përfaqësuesit e komuniteteve jo shumicë.

Kabineti i Qeverisë Kurti 4:

Albin Kurti – kryeministër

Glauk Konjufca – zëvendëskryeministër i parë dhe ministër i Punëve të Jashtme dhe Diasporës

Donika Gërvalla-Schwarz – zëvendëskryeministre e dytë dhe ministre e Drejtësisë

Fikrim Damka – zëvendëskryeministër i tretë për Çështje të Pakicave dhe Bashkëpunim

Hekuran Murati – ministër i Financave

Andin Hoti – ministër për Punë, Familje dhe Vlerat e Luftës Çlirimtare

Ejup Maqedonci – ministër i Mbrojtjes

Xhelal Sveçla – ministër i Punëve të Brendshme

Lulëzon Jagxhiu – ministër i Digjitalizimit dhe Administratës Publike

Arben Vitia – ministër i Shëndetësisë

Hajrulla Çeku – ministër i Arsimit dhe Shkencës

Saranda Bogujevci – ministre e Kulturës dhe Turizmit

Blerim Gashani – ministër i Sportit dhe Rinisë

Elbert Krasniqi – ministër i Administrimit të Pushtetit Lokal

Fitore Pacolli – ministre e Mjedisit dhe Planifikimit Hapësinor

Armend Muja – ministër i Bujqësisë, Pylltarisë dhe Zhvillimit Rural

Dimal Basha – ministër i Infrastrukturës dhe Transportit

Mimoza Kusari-Lila – ministre e Industrisë, Ndërmarrësisë, Tregtisë dhe Inovacionit

Artane Rizvanolli – ministre e Ekonomisë

Nenad Rashiq – ministër për Komunitete dhe Kthim

Rasim Demiri – ministër për Zhvillim Rajonal

Pas votimit, kabineti i ri dha betimin para Kuvendit.

Ndërkohë, përplasja politike dhe juridike mbetet e hapur, pasi PDK-ja ka paralajmëruar dërgimin e çështjes së konstituimit të Kuvendit në Gjykatën Kushtetuese.