Zgjedhja e presidentit, Kurti: Jemi shumë afër marrëveshjes, zgjedhjet e reja do të ishin papërgjegjësi

Kryeministri i Kosovës, Albin Kurti, ka bërë thirrje për zgjidhjen e çështjes së presidentit, duke thënë se vendi është shumë afër një marrëveshjeje politike dhe se shkuarja sërish në zgjedhje do të ishte e papërgjegjshme ndaj interesit publik.

Një ditë pas votimit të Qeverisë së re në Kuvendin e Kosovës, në mbledhjen e parë të kabinetit “Kurti IV”, ai ka deklaruar se sfida kryesore tashmë është zgjedhja e presidentit, për çka tha se ekziston një marrëveshje politike ndërmjet Lëvizjes Vetëvendosje dhe Lidhjes Demokratike të Kosovës.

Ai u ka bërë thirrje liderëve politikë dhe deputetëve që ta zbatojnë marrëveshjen e arritur, duke iu referuar edhe kundërshtimeve të disa deputetëve të LDK-së.

Kuvendi i Kosovës votoi një ditë më parë Qeverinë e re, të udhëhequr nga Albin Kurti. Pas formimit të institucioneve të reja, zgjedhja e presidentit mbetet çështja kryesore politike.

LVV-ja dhe LDK-ja kanë zhvilluar negociata për tejkalimin e ngërçit institucional dhe sigurimin e votave të nevojshme për presidentin. Palët kanë arritur marrëveshje politike, por ajo është kundërshtuar nga disa deputetë të LDK-së.

Për zgjedhjen e presidentit, Kushtetuta kërkon së paku tetëdhjetë vota në dy raundet e para. Në raundin e tretë mjaftojnë gjashtëdhjetë e një vota. Për zhvillimin e votimit kërkohet prania e së paku tetëdhjetë deputetëve.

Në rast se presidenti nuk zgjidhet as në raundin e tretë, Kuvendi shpërndahet dhe zgjedhjet e reja duhet të mbahen brenda dyzet e pesë ditësh.