Balliu: Kayo nën hetim parlamentar, pyetjet për Ron Yeffet dhe rrethin e Ramës kërkojnë përgjigje

14 Shtator 2026, 11:46, Politikë CNA

Balliu: Kayo nën hetim parlamentar, pyetjet për Ron Yeffet dhe rrethin

Deputeti i Partisë Demokratike, Klevis Balliu, ka bërë të ditur depozitimin e kërkesës për ngritjen e një Komisioni Hetimor Parlamentar për KAYO-n.

Në një qëndrim lidhur me çështjen, Balliou thekson se nuk bëhet fjalë për një rast të zakonshëm administratv, por për pikëpyetje serioze që lidhen me sigurinë kombëtare, kontrollin shtetëror dhe aktivitetin e kompanisë në sektorin e armëve dhe teknologjisë ushtarake.

Sipas Balliut, një nga emrat që kërkon verifikim të plotë është ai i Ron Yeffet, lidhjet e raportuara mes tij dhe kompanisë “KAYO”, si edhe me kryeministrin Edi Rama.

“Nuk kemi më përpara një çështje të zakonshme administrative. Kemi një kompani shtetërore që operon në një sektor strategjik, kontrata dhe pagesa me vlera të konsiderueshme, partneritete që kërkojnë transparencë dhe materiale publike që ngrejnë dyshime serioze për mënyrën e importimit, trajtimit dhe qarkullimit të armëve.

Emri i Ron Yeffet kërkon përgjigje. Po kështu kërkon verifikim çdo informacion mbi përfshirjen e tij në hetimet që lidhen me dosjen e AKSHI-t. Nëse kjo rrethanë konfirmohet nga organet kompetente, atëherë kemi një arsye edhe më të fortë që të zbardhen të gjitha marrëdhëniet ekonomike dhe institucionale

Ai ka ngritur gjithashtu pikëpyetje mbi krijimin, më 23 mars 2026, të shoqërisë “Timak Horse Club”, me pronar përfitues Ron Yeffet, dhe lidhjen e aktivitetit të saj me “Equos Resort” në Petrelë.

Çfarë lidhjeje ka Ron Yeffet me Ergys Agasin dhe ‘Equos Resort’? Kush i ka dhënë të drejtën e përdorimit të këtij kompleksi? A ka pasur kontrata, pagesa apo transaksione? Dhe a ekziston ndonjë lidhje me çështjet e hetuara në dosjen e AKSHI-t?.

Parlamenti nuk po kërkon të zëvendësojë SPAK-un. SPAK duhet të hetojë çdo dyshim për vepra penale. Parlamenti ka detyrimin kushtetues të ushtrojë kontrollin parlamentar dhe të zbardhë përgjegjësinë politike dhe institucionale.

Nëse nuk ka asgjë për të fshehur, pse duhet të trembet qeveria nga hetimi parlamentar? Nëse KAYO është krijuar për interesin e mbrojtjes së vendit, atëherë transparenca duhet të jetë e plotë. Kur bëhet fjalë për armë, para publike dhe sigurinë kombëtare, askush nuk mund të jetë mbi ligjin. As Edi Rama, as njerëzit pranë pushtetit dhe asnjë kompani private. Shteti shqiptar nuk mund të jetë mburojë për askënd”,-shprehet Balliu./CNA