Europa numër rekord fluturimesh gjatë verës/ Shqipëria, ndër destinacionet me rritje të lartë

14 Shtator 2026, 11:55, Lifestyle CNA

Europa numër rekord fluturimesh gjatë verës/ Shqipëria,

Hapësira ajrore e Europës regjistroi nivelin më të lartë të trafikut të shënuar ndonjëherë gjatë sezonit veror të pushimeve, nga korriku në gusht 2026, pavarësisht ndërprerjeve të shkaktuara nga lufta në Lindjen e Mesme.

Sipas të dhënave të publikuara nga Eurocontrol, organizata europiane për sigurinë e navigimit ajror, në Europë u regjistruan mesatarisht 35,959 fluturime në ditë, 2.4% më shumë se në vitin 2025, ndërsa të premten, më 10 korrik, u arrit rekordi prej 37,640 fluturimesh.

Pavarësisht rritjes së trafikut në të gjithë kontinentin, 72.6% e fluturimeve mbërritën në kohë, 1.2 pikë përqindje më shumë se në vitin 2025.

Franca vijoi të kishte performancën më të dobët për vonesat e shkaktuara nga problemet në menaxhimin e trafikut ajror, duke qenë e vetme përgjegjëse për 32% të të gjitha vonesave.

Edhe pse Eurocontrol pranoi se lufta SHBA-Iran “ndikoi” në sezonin turistik të këtij viti, konflikti ka nxitur gjithashtu shumë europianë të kalojnë pushimet brenda kontinentit të tyre, i cili perceptohet gjerësisht si më i sigurt.

Cilat destinacione turistike përfituan më shumë?

Raporti i Eurocontrol, i publikuar të premten, tregoi se konflikti ka sjellë trafik më të ulët në Bullgari, Hungari dhe Turqi, por një “rritje të lartë” në vende si Shqipëria, Kroacia, Qiproja, Greqia, Mali i Zi, Maqedonia e Veriut, Serbia dhe Sllovenia, ndërsa në Europën Jugperëndimore është regjistruar “rritje e vazhdueshme”.

Numri rekord i pasagjerëve në aeroportet e Greqisë e çoi sistemin e kontrollit të trafikut ajror në kufijtë e kapacitetit, veçanërisht gjatë sezonit të pikut.

Katërmbëdhjetë vende regjistruan këtë verë nivelin më të lartë të trafikut ditor të shënuar ndonjëherë, për sa u përket mbërritjeve dhe nisjeve. Mes tyre ishin Shqipëria, Armenia, Gjeorgjia, Greqia, Irlanda, Italia, Moldavia, Maqedonia e Veriut, Mali i Zi, Portugalia, Serbia, Sllovakia, Spanja dhe Turqia.

Edhe disa kompani dhe grupe ajrore regjistruan nivele rekord të trafikut, përfshirë Aegean, Air Serbia, easyJet, Jet2.com, Pegasus, Royal Air Maroc, Ryanair, Sky Express, SunExpress, Turkish Airlines dhe Wizz Air./ Euronews