Deputeti i PD, Eno Bozdo shprehet se KESH refuzon të anulojë tenderin 20 milionë euro për tec-et e Vlorës.

Përmes një reagimi në rrjetet sociale, Bozdo shkruan se korrupsioni vijon, ndërsa SPAK ende nuk ka nisur asnjë veprim për këtë aferë megakorrupsioni.

‘Javën e kaluar, pas refuzimit të ERRE për të liçencuar TEC lundrues 1 dhe 3, kam kërkuar publikisht anulimin e tenderit të KESH për operimin dhe mirëmbajtjen e “Tigrave të Vlorës”, shkruan Bozdo.

‘Paratë publike nuk janë pronë e KESH-it. Janë paratë e shqiptarëve dhe çdo lek duhet të justifikohet’, përmbyll reagimin deputeti i PD.

Stausi:

KESH refuzon të anulojë tenderin 20 milionë euro për “Tigrat e Vlorës”!

Korrupsioni vazhdon!

SPAK ende pa filluar asnjë veprim për këtë aferë megakorrupsioni!

Javën e kaluar, pas refuzimit të ERRE për të liçencuar TEC lundrues 1 dhe 3, kam kërkuar publikisht anulimin e tenderit të KESH për operimin dhe mirëmbajtjen e “Tigrave të Vlorës”.

Por tenderi nuk është anuluar.

Procedura, me fond limit 20 milionë euro pa TVSH, ngre shqetësime serioze:

1. Rimbursim pa kufi të qartë për Lube Oil!

Termat e Referencës parashikojnë që operatori ta blejë vetë Lube Oil dhe KESH t’ia rimbursojë koston kundrejt faturës. Por nuk përcaktohet çmim tavan apo formulë e qartë kontrolli, duke hapur derën për korrupsionin e radhës.

2. Pikëpyetje mbi fondin limit!

Mungesa e një mekanizmi të qartë për kontrollin e kësaj kostoje ngre pikëpyetje se si është përllogaritur fondi limit prej 20 milionë eurosh dhe nëse është garantuar vlera më e mirë për paratë publike.

3. Dyshime mbi konkurrencën reale

Kushtet e procedurës dhe mënyra e përcaktimit të kostove tregojnë që nuk është garantuar konkurrim real dhe i barabartë.

4. Dyshime se RENCO është fitues i paracaktuar!

Në kushtet e kësaj procedure, mënyra e hartimit të kërkesave dhe specifikimeve krijon dyshime të forta që RENCO mund të jetë favorizuar si fitues i paracaktuar, ndaj kjo duhet të hetohet nga SPAK, siç edhe duhet të hetohet e gjithë afera e Tigrave!

Kërkesa është e qartë: tenderi duhet të anulohet. Nuk mund të japim 20 milionë euro për 2 TEC që nuk prodhojnë!

Paratë publike nuk janë pronë e KESH-it. Janë paratë e shqiptarëve dhe çdo lek duhet të justifikohet.