Nafta 108 dollarë/fuçia, rritet presioni për çmimin mbi 220 lekë në Shqipëri

Nafta në tregjet ndërkombëtare po shtrenjtohet me ritme të shpejta, duke shtuar presionin që çmimi në pikat e karburanteve në Shqipëri të kalojë 220 lekë për litër. Rritja vjen pas tensioneve në Lindjen e Mesme dhe rënies së ndjeshme të furnizimeve përmes Ngushticës së Hormuzit.

Çmimi i naftës është rritur në 108 dollarë për fuçi, këtë fillim jave, duke rritur presionet që ajo të tejkalojë cmimin 220 lekë për litër në pikat e karburanteve në Shqipëri.

Nafta Brent u rritë me më shumë se 3%, pas zhvillimeve të reja në lindjen e mesme, ku një anije tregtare u godit në Ngushticën e Hormuzit. Në të njëjtën kohë, Arabia Saudite mbylli përkohësisht linjën e saj kryesore të naftës që transporton drejt Detit të Kuq, dhe shmang Hormuzin.

Kjo ka shtuar frikën për ndërprerje të furnizimeve, pasi përmes kësaj ngushtice kalonin rreth 20 milionë fuçi naftë në ditë para luftës. Tashmë, flukset kanë rënë në rreth 7 milionë fuçi dhe pasojat e kësaj situate po ndihen edhe në Europë e Shtetet e Bashkuara.

Presidenti Donald Trump ka fajësuar edhe sulmet ukrainase ndaj rafinerive ruse për mungesën e dieselit, por analistët vlerësojnë se ndërprerjet pranë Hormuzit kanë shkaktuar humbje më të mëdha të furnizimit.

Në tregjet ndërkombëtare, frika për një krizë më të thellë energjetike po shton presionin mbi çmimet e naftës dhe karburanteve.