Gjykata Kundër Korrupsionit dhe Krimit të Organizuar pritet të zhvillojë të martën e 15 shtatorit, një seancë me rëndësi për dy prej emrave më të njohur të politikës shqiptare, Ilir Metën dhe Erion Veliajn.
Nesër, të dy politikanët kanë kërkuar ndryshimin e masës së sigurisë dhe lirimin nga burgu, ndërsa vendimmarrja e gjykatës itet me interes të madh edhe për shkak të peshës politike të dy çështjeve.
Kërkesa e ish-presidentit Ilir Meta ishte parashikuar të shqyrtohej një ditë më parë, por seanca është shtyrë për ditën e nesërme.
Në të njëjtën kohë, edhe kërkesa e ish-kryebashkiakut të Tiranës, Erion Veliaj, për ndryshimin e masës së sigurisë është në shqyrtim nga gjykata.
Ende nuk dihet se cili do të jetë vendimi i GJKKO-së për dy politikanët që ndodhen në burg. Çdo vendimmarrje pritet të shoqërohet me vëmendje të madhe publike dhe politike.
Në rast se gjykata vendos të lërë në fuqi masat e sigurisë, pritet të rikthehet debati mbi nevojën e vijimit të paraburgimit, në kushtet kur një pjesë e provave në dosjet përkatëse mund të jenë administruar tashmë.
Nëse vendimi do të jetë për lirimin e tyre, debati publik pritet të jetë edhe më i fortë, me kritikë të mundshme ndaj drejtësisë dhe pretendime për ndikim politik.
Pikërisht për këtë arsye, vendimmarrja për Metën dhe Veliajn konsiderohet një moment i rëndësishëm për GJKKO-në dhe për sistemin e drejtësisë në tërësi./Versus.al
