Të provosh një parfum zakonisht do të thotë ta spërkatësh në një letër ose në kyçin e dorës. Në New York, një markë parfumesh po eksperimenton sot me një mënyrë shumë më të pazakontë: aromën mund ta nuhasësh dhe më pas të provosh një pije të frymëzuar prej saj.
NEST New York po promovon parfumin Cardamom Latte përmes një kafeneje të përkohshme në Meatpacking District të Manhattan-it. Koncepti bashkon parfumin me një latte të frymëzuar nga të njëjtat nota aromatike, mostra të produktit dhe eksperienca të krijuara rreth kombinimit të aromave.
Natyrisht, vetë parfumi nuk pihet. Ideja është që e njëjta botë aromatike të përjetohet përmes shqisave të ndryshme dhe kjo tregon një ndryshim interesant në mënyrën se si po shiten produktet e bukurisë. Në një dyqan tradicional, parfumi qëndron në raft. Klienti e provon, sheh paketimin dhe vendos nëse do ta blejë. Por ky model është gjithnjë e më i vështirë për t’u dalluar në një treg ku konsumatori ekspozohet ndaj qindra produkteve të reja çdo muaj.
Një kafene krijon diçka tjetër, një eksperiencë.
Klienti mund të hyjë për kafenë, të provojë parfumin, të bëjë fotografi dhe më pas ta ndajë eksperiencën në rrjetet sociale. Produkti nuk është më vetëm një shishe. Është ambienti, pija, aroma dhe historia që lidhet me të.n Kjo është veçanërisht interesante për parfumerinë, sepse aroma ka një problem të madh në epokën e tregtisë online: nuk mund të transmetohet përmes ekranit.
Një markë mund të tregojë një shishe të bukur në TikTok, por nuk mund t’i tregojë përdoruesit si nuhatet. Prandaj kompanitë po përpiqen të ndërtojnë një botë rreth aromës përmes ngjyrave, ushqimit, vendeve dhe emocioneve që publiku mund t’i kuptojë edhe pa e provuar produktin.
Edhe vetë emërtimi “Cardamom Latte” është pjesë e kësaj logjike. Shumica e njerëzve kanë një ide se çfarë ndjesie krijojnë kardamomi, kafeja dhe një pije e ngrohtë, edhe përpara se të nuhasin parfumin. Kështu kufiri mes bukurisë, gastronomisë dhe mikpritjes po bëhet gjithnjë e më i paqartë.
