web counter
LEXO PA REKLAMA!

SHKARKO APP

App Store
Google Play

E fundit!

x

Rritja e çmimit të naftës/ Bozdo: Situata emergjente, qeveria të ndërhyjë me lehtësira fiskale

15 Shtator 2026, 10:43, Aktualitet CNA

Rritja e çmimit të naftës/ Bozdo: Situata emergjente, qeveria

Deputeti i Partisë Demokratike, Enno Bozdo, në një deklaratë për mediat, është shprehur se ditët e fundit çmimi i naftës në vend ka arritur nivele rekord dhe të papërballueshme.

Bozdo shprehet se tregtimi i naftës me 229 lekë për litër e nxjerr Shqipërinë si vendin me çmimin më të lartë në rajon dhe mbi mesataren e BE-së.

Ai shton më tej se arsyeja kryesore e çmimeve kaq të larta të naftës në Shqipëri është ngarkesa shumë e lartë fiskale. Ndër të tjera, shton se në dallim me vendet e tjera të rajonit dhe të BE-së, në Shqipëri nuk po merret asnjë masë lehtësuese për situatën.

Bozdo thekson se Partia Demokratike i qëndron propozimit të eliminimit të taksës mbi qarkullimin dhe uljes së përkohshme të akcizës, kombinim ky që do ta sillte çmimin e naftës në Shqipëri në mesataren e rajonit.

DEKLARATA E PLOTË:

Këto ditë, çmimi i diezelit/karburantit në Shqipëri ka arritur nivele rekord, të papërballueshme për ekonominë tonë familjare, por edhe atë prodhuese, duke u tregtuar me rreth 229 lekë për litër, ose ndryshe rreth 2,5 euro për litër.

Ky nivel e vendos Shqipërinë:

Si vendin me çmimin më të lartë të naftës në rajon, rreth 30% mbi mesataren rajonale;

Mbi mesataren e Bashkimit Europian, ku çmimi mesatar i naftës ishte 2 €/L (më 7 shtator 2026)

Mesatarja botërore: 1,4 euro/L

Mesatarja në BE?27: 2,03 €/L

Sipas të dhënave globale (Global Petrol Prices, Fuel Wide), Shqipëria:

është në grupin e 5 vendeve më të shtrenjta në Europë për naftë, bashkë me Monakon, Finlandën, Gjermaninë, Holandën dhe Danimarkën.

ka çmim nafte dukshëm mbi mesataren europiane dhe rreth 55–60% mbi mesataren botërore.

Për krahasim, në të njëjtën periudhë çmimet e naftës në vendet fqinje janë:

Serbi: rreth 2,00 €/L ose 18% më lirë se në Shqipëri;

Kosovë: rreth 1,76 €/L ose 32% më lirë se në Shqipëri;

Maqedoni e Veriut: rreth 1,6 €/L  ose 41% më lirë se në Shqipëri;

Mal i Zi: rreth 1,87 €/L ose 20% më lirë se në Shqipëri;

Bosnjë?Hercegovinë: rreth 1,7 €/L ose 27% më lirë se në Shqipëri;

Arsyeja kryesore sot e çmimeve kaq të larta të naftës në Shqipëri është ngarkesa shumë e lartë fiskale: shqiptarët paguajnë taksa afërsisht dyfishin e rajonit, dhe nuk marrin në këmbim atë që meritojnë!

Në çmimin final të karburanteve në Shqipëri, ngarkesa fiskale përbën rreth 53% (afërsisht 1,00–1,16 €/L taksa për litër), përfshirë:

akcizën fikse (~0,41 €/L),

taksën e qarkullimit,

taksën e karbonit, dhe

TVSH?në 20% që aplikohet mbi çmimin total, pra edhe mbi taksat e tjera.

Në vendet e rajonit, barra fiskale mbi naftën është dukshëm më e ulët, zakonisht rreth 35% e çmimit final. Kjo do të thotë se, për të njëjtin çmim ndërkombëtar të naftës, qytetarët dhe bizneset në Shqipëri paguajnë taksa afërsisht dyfishin e rajonit për litër naftë.

Ajo që e veçon Shqipërinë përsëri, në dallim me vendet e tjera të rajonit dhe të BE-së, është mungesa totale e masave lehtësuese, ndërsa të gjitha vendet e rajonit kanë vepruar me ndërhyrje fiskale lehtësuese:

Serbia ka ulur përkohësisht akcizat mbi benzinën dhe naftën,

Maqedonia e Veriut ka ulur TVSH?në për karburantet nga 18% në 10%, për të zbutur ndikimin e çmimeve të larta.

Kosova, Mali i Zi dhe Bosnja kanë përdorur në periudha të mëparshme ulje akcizash dhe kufizime marzhesh, duke mbajtur çmimet më të ulëta se në Shqipëri.

Nuk mund të mos përmendim këtu edhe një argument tjetër: ndërsa çmimet e naftës rriten, qytetarët paguajnë më shtrenjtë nga xhepi i tyre, qeveria fryhet. Nga kriza e mëparshme e naftës, qeveria shqiptare arkëtoi rreth 15 milionë euro më shumë në xhepat e saj, në mënyrë të pamerituar. Asnjë qeveri normale nuk i mban këto para, por gjen mekanizmat për t'ua kthyer ato ekonomisë dhe familjeve. Sepse asnjë qeveri e përgjegjshme nuk pranon të majmet, kur popullata e saj varfërohet!

Përballë kësaj situate të paprecedentë, që nuk dihet se si dhe se kur do të zgjidhet, dhe që realisht ka tronditur tregjet në të gjitha vendet, të gjitha qeveritë në botë kanë zgjedhur një apo disa mekanizma lehtësimi të cilat i aplikojnë mbi strukturën/ngarkesën fiskale të çmimit të naftës, për të lehtësuar, me aq sa kanë mundësi, çmimin e lartë të saj, i cili, ka ndikim jo vetëm në ekonomitë familjare të secilit prej nesh, por mbi të gjitha në ekonominë prodhuese dhe atë të shërbimeve.

Për këtë qëllim, Partia Demokratike i kërkon me këmbëngulje qeverisë të lehtësojë menjëherë ngarkesën fiskale mbi karburantet. Në veçanti, ne i qëndrojmë propozimit tonë të eliminimit të taksës mbi qarkullimin dhe uljes së përkohshme të akcizës, kombinim ky që do ta sillte çmimin e naftës në Shqipëri në mesataren e rajonit.

Më duhet të rikujtoj këtu se çdo iniciativë ligjore e Partisë Demokratike për një propozim të tillë, është rrëzuar me votat e Partisë Socialiste në Kuvend!

Çdo refuzim i mëtejmë i këtyre nismave si dhe çdo këmbëngulje në pozicionin e papërgjegjshmërisë, do të sjellë pasoja shumë të rënda për të gjithë. /CNA





Lajmet e fundit nga