Juventusi në krizë, Spalletti nën presion. Tifozët kërkojnë ish-trajnerin
Humbja 3-2 ndaj Sassuolos në “Mapei Stadium” ka rikthyer pasiguritë te Juventusi. Bardhezinjtë po kalojnë një periudhë të vështirë dhe në qendër të kritikave është trajneri Luciano Spalletti, i cili prej më shumë se dhjetë muajsh drejton skuadrën torineze.
Spalletti ka përjetuar një periudhë me shumë ulje-ngritje në stolin e Juventusit, ndërsa zhgënjimi më i madh mbetet moskualifikimi në Champions League sezonin e kaluar. Trajneri nuk ka kërkuar justifikime për shkak të numrit të madh të dëmtimeve në skuadër, por mënyra se si u menaxhua ndeshja ndaj Sassuolos ka ngjallur debate.
Juventusi, në kërkim të fitores pas barazimit 2-2, u hodh shumë në sulm dhe la hapësira pas, duke pësuar në fund golin vendimtar të Adzic për rezultatin 3-2. Ironikisht, Adzic është një talent i ri malazez që Juventusi e kishte huazuar te Sassuolo me miratimin e vetë Spallettit.
Golat vijnë nga lojtarët e “ringjallur”
Një tjetër element që tregon kontradiktat e momentit te Juventusi është fakti se pesë nga gjashtë golat e shënuar në kampionat kanë ardhur nga futbollistë që fillimisht ishin jashtë planeve kryesore të trajnerit, por më pas u rikthyen në skuadër.
Nico Gonzalez, Koopmeiners, Gatti dhe Zhegrova, autor i dy golave, kanë qenë protagonistë në fazën sulmuese. Golin tjetër e ka shënuar Bremer.
Situata është bërë edhe më paradoksale nga fakti se një prej lojtarëve të larguar në huazim, Adzic, i shkaktoi Juventusit një humbje të dhimbshme.
Te tifozët po rritet pakënaqësia dhe në horizont ka nisur të përmendet sërish emri i Antonio Contes, aktualisht pa kontratë.
Europa League si mundësi për reagim
Juventusi do të ketë mundësinë të reagojë menjëherë këtë të enjte, me debutimin në Europa League përballë skuadrës holandeze NEC Nijmegen.
Sfida konsiderohet shumë e rëndësishme për bardhezinjtë, të cilët synojnë të mbeten protagonistë në futbollin europian.
Spalletti shpreson të ketë në dispozicion Cambiason dhe McKennien, ndërsa nuk do të mund të llogarisë Zhegrovën, i cili nuk është përfshirë në listën UEFA-s.
Juventusi vazhdon kështu një sezon ku dëmtimet, ndryshimet në formacion dhe vendimet e merkatos e kanë detyruar skuadrën të rindërtojë vazhdimisht ekuilibrat. Sfida ndaj NEC Nijmegen vjen në një moment delikat dhe mund të jetë një mundësi për Spallettin që të qetësojë situatën dhe të rikthejë besimin te skuadra.
