Roma sapo kishte marrë fitoren 2-0 në fushën e Torinos me golat e të zakonshmit Malen dhe Pisilli. Ndeshja e katërt e kampionatit dhe fitorja e katërt, 12 pikë nga 12. Më pas, gjatë konferencës për shtyp të teknikut Gian Piero Gasperini, dikush e informoi trajnerin për atë që po ndodhte disa qindra kilometra më tej: Inter po humbiste 0-2 kundër Udineses.
Gasperini nuk festoi, nuk bëri shaka për renditjen dhe as nuk komentoi rezultatin. Bëri vetëm një pyetje: “Sa është ora?”. Në retrospektivë duket pothuajse si një profeci. Në të vërtetë ishte shumë më e thjesht: përgjigjja e një trajneri që e dinte shumë mirë se sa futboll kishte mbetur ende për t’u luajtur.
Gasperini nuk i beson 0-2 të Interit: “Sa është ora?”
Udinese kishte tronditur në San Siro në vetëm 16 minuta: Abankwah në minutën e 9' dhe Ekkelenkamp në të 16' e kishin çuar skuadrën e Runjaic në 0-2. Pikërisht, në atë moment, Gasperini mësoi rezultatin e sfidës në Meazza. Pyetja për orën e përmban tashmë përgjigjen: është shumë herët.
Dhe kishte edhe një arsye tjetër për të mos i besuar atij 0-2. Skuadra e teknikut Chivu, në vitin 2026, kishte treguar tashmë disa herë se dinte të dilte nga situata pothuajse identike. Në janar kishte qenë në disavantazh 0-2 kundër Pisës, përpara se ta shkatërronte 6-2; në prill kishte përmbysur të njëjtin disavantazh të dyfishtë kundër Comos, duke fituar 4-3 në kampionat dhe më pas përsëri 3-2 në gjysmëfinalen e Kupës së Italisë. Në maj, në Bolonjë, kishte arritur madje të rikuperonte nga 1-3 në 3-3. Dhe mbi të gjitha, vetëm nëntë ditë para Udineses, kishte dhënë tashmë një mesazh shumë të qartë në këtë kampionat: 0-2 kundër Napolit në minutën e 53', 3-2 në minutën e 90'.
Kundër Udineses, skenari u përsërit edhe një herë. Interit i duhen në fakt vetëm dhjetë minuta nga goli i dytë i friulianëve për të filluar të rikthejë ndeshjen në binarë. Në minutën e 26' Carlos Augusto shënon 1-2, në të 35' Barella barazon. Në pjesën e dytë më pas vijnë Thuram, Pio Esposito dhe Bonny për 5-2, përpara golit të fundit të Udineses në fund që fikson rezultatin në 5-3.
Kështu, ajo pyetje e thjeshtë e teknikut Gasperini bëhet edhe më domethënëse në fund të mbrëmjes. Roma kishte marrë përkohësisht e vetme kreun e Serie A, por Interi e arriti pak më vonë: të dyja janë me nga 12 pikë pas katër javësh. Dhe kalendari ka vendosur ta bëjë skenën edhe më interesante, sepse në javën e ardhshme të dyja skuadrat do të përballen drejtpërdrejt në Olimpico.
Gasperini, në fund të fundit, kishte folur edhe pak më parë për Interin. Ai e kishte cilësuar “skuadrën e referencës së kampionatit tonë”, duke kujtuar se pikërisht nga humbja e rëndë e pësuar kundër zikaltërve sezonin e kaluar kishte lindur, sipas tij, “Roma e vërtetë”. Më pas i thanë se i njëjti Inter po humbiste 0-2. Ai pa orën, në mënyrë metaforike dhe jo vetëm. Ishte ende shumë herët për të bërë llogaritë.
