web counter
LEXO PA REKLAMA!

SHKARKO APP

App Store
Google Play

Pagat e gjyqtarëve/ Gogu te “Ligjet”: Kuvendi humbi afatin, por zgjidhja bëhet me ligj

15 Shtator 2026, 12:54, Aktualitet CNA

Pagat e gjyqtarëve/ Gogu te “Ligjet”: Kuvendi humbi afatin, por

Ministri i Drejtësisë, Toni Gogu, gjatë fjalës së tij te Komisioni për Çështjet Ligjore, u shpreh se përgjegjësia për mosrespektimin e afatit të 31 korrikut për pagat e magjistratëve është e procesit ligjvënës, por theksoi se vonesa e Kuvendit nuk mund të ndryshojë ndarjen kushtetuese të kompetencave mes pushteteve.

Ministri u shpreh po ashtu se debati nuk duhet reduktuar te niveli i pagës së gjyqtarëve, por te mënyra kushtetuese me të cilën ajo përcaktohet.

“Kuvendi e humbi afatin e 31 korrikut. Këtë nuk e mbroj dhe nuk do të mundohem ta mbroj. Por vonesa e Kuvendit ishte shkelje e një afati. Përgjigjja ndaj saj nuk mund të jetë shkelje e parimit të ndarjes së pushteteve. Pyetja nuk është sa duhet të marrë një gjyqtar. Pyetja është kush e vendos sa merr. Dhe përgjigjen nuk e jap unë. E jep vetë vendimi që kërkohet të zbatohet: paga caktohet me ligj”, tha Gogu.

Ai shtoi se mosveprimi i Kuvendit nuk mund të përdoret për të zhvendosur kompetencën e tij te një institucion tjetër.

“Një boshllëk ligjor, sado i krijuar prej nesh, nuk është një kompetencë e lirë që e merr kush mbërrin i pari. Përgjigjja ndaj vonesës sonë është që Kuvendi të bëjë detyrën e vet, jo që arkitektura kushtetuese të rishkruhet nga nevoja e momentit”, u shpreh ministri.

Lidhur me shumën konkrete të pagave, ai tha se koston financiare e paraqet Ministria e Financave.

“Unë nuk kam ardhur këtu të mbroj një numër. Shifrën, metodologjinë dhe faturën financiare i paraqet Ministria e Financave. Përgjegjësia ime është të mbroj standardin që zgjidhja të jetë kushtetuese, e qëndrueshme dhe e zbatueshme”, tha Gogu. /CNA





Lajmet e fundit nga