Protesta masive në Toronto, qytetarët kanadezë kundërshtojnë projektet e investimeve
Qindra protestues dolën në rrugët e Torontos ne Kanada, ndërsa në qytet zhvillohej samiti i investimeve i organizuar nga kryeministri Mark Carney.
Në protestë u bashkuan sindikalistë, aktivistë për të drejtat e migrantëve, ambientalistë dhe grupe të drejtësisë sociale.
Ata kundërshtojnë planet e qeverisë kanadeze për të tërhequr investime të mëdha në më shumë se 160 projekte në sektorët e minierave, energjisë, teknologjisë dhe infrastrukturës.
Protestuesit thonë se projektet e promovuara nga qeveria mund të sjellin zgjerimin e infrastrukturës së karburanteve fosile, rritjen e prodhimit ushtarak dhe kalimin e një pjese më të madhe të aseteve publike në duart e investitorëve privatë.
Kundërshtimet lidhen edhe me politikat e reja ekonomike të Carney-t, i cili ka rikthyer në fokus industrinë e burimeve natyrore dhe rritjen ekonomike, duke zbutur disa prej politikave klimatike të paraardhësit të tij, Justin Trudeau.
Por qeveria e Carney-t e sheh samitin si një mundësi për të tërhequr kapital ndërkombëtar dhe për të diversifikuar ekonominë kanadeze, veçanërisht përtej varësisë ekonomike nga Shtetet e Bashkuara.
Samiti synon të lidhë kompanitë kanadeze me investitorë nga e gjithë bota, ndërsa qeveria kërkon të forcojë lidhjet ekonomike me Evropën, Azinë dhe Lindjen e Mesme.Pavarësisht protestave, Carney vazhdon të ketë një mbështetje të lartë në sondazhe, veçanërisht për qëndrimin e tij ndaj tarifave tregtare të presidentit amerikan Donald Trump.
