Gjykata Supreme Federale e Brazilit ka miratuar unanimisht kërkesën e Shqipërisë për ekstradimin e Ervin Matës, i njohur edhe me nofkën “Boli”. Vendimi është marrë nga trupi i parë i gjykatës gjatë një seance virtuale të zhvilluar nga 14 deri më 21 gusht.
Sipas vendimit të gjykatës braziliane, dokumentacioni i paraqitur nga autoritetet shqiptare plotëson kushtet ligjore për ekstradim. Mata kërkohet nga drejtësia shqiptare në kuadër të një procedimi penal për akuza që lidhen me trafikimin e lëndëve narkotike, bashkëpunimin dhe pjesëmarrjen në grup të strukturuar kriminal.
Megjithatë, vendimi i Gjykatës Supreme nuk nënkupton dorëzimin automatik të Matës te autoritetet shqiptare. Sipas procedurës braziliane, ekstradimi varet tashmë nga vendimi diskrecional i Presidentit të Brazilit.
Përpara dorëzimit, Shqipëria duhet gjithashtu të formalizojë garancitë e kërkuara nga ligji brazilian. Ndër kushtet janë që Mata të mos ndiqet penalisht për një fakt tjetër të mëparshëm nga ai për të cilin është kërkuar ekstradimi, t’i llogaritet koha e qëndrimit në paraburgim në Brazil dhe të mos i nënshtrohet torturës apo trajtimit mizor, çnjerëzor ose degradues.
Të Dhënat Nga Sky ECC
Në dosjen e administruar nga Gjykata Supreme Federale e Brazilit përfshihen edhe të dhëna të siguruara nga komunikimet në aplikacionin e koduar “Sky ECC”.
Sipas materialeve të dosjes, në vitin 2020 përdoruesi me identifikuesin “GS4TDD”, i identifikuar nga autoritetet si Ervin Mata, kishte komunikuar për transportin e një sasie prej rreth 250 kilogramësh kokainë nga Brazili drejt aeroportit të Frankfurtit në Gjermani.
Në një komunikim të datës 29 shtator 2020, përmendet sekuestrimi i 240 njësive të mallit në Frankfurt. Në një tjetër bisedë, përdoruesi i identifikuar si Mata shprehet se “të gjitha mallrat e mia u sekuestruan në Frankfurt, në doganë”. Në komunikimet e administruara në dosje përmendet gjithashtu edhe dërgimi i parave përmes personave të tjerë.
Kush Është Ervin Mata?
Ervin Mata, i njohur edhe si “Boli”, është një emër i njohur për drejtësinë shqiptare dhe prej vitesh është përfshirë në hetime që lidhen me krimin e organizuar dhe trafikun e narkotikëve.
Emri i tij u bë i njohur për publikun pas ngjarjes së 4 tetorit 2018 në zonën e ish-Bllokut në Tiranë, ku gjatë një përplasjeje me armë në lokalin “Monopol” mbeti i vrarë Fabjol Gaxha, ndërsa u plagosën Ervis Martinaj dhe Eljon Hato.
Fillimisht, ngjarja u lidh me një konflikt të nisur për shkak të një përplasjeje mes personave të pranishëm në lokal. Më vonë, hetimet e autoriteteve e lidhën përplasjen edhe me konflikte për trafikun e kokainës.
Sipas hetimeve të SPAK, Mata dyshohet se ka pasur rol në një rrjet ndërkombëtar të trafikut të kokainës, me shtrirje nga Amerika e Jugut drejt Shqipërisë dhe vendeve të Bashkimit Europian.
Në nëntor 2023, ai u shpall në kërkim pas lëshimit të urdhër-arresteve në kuadër të një hetimi të Prokurorisë së Posaçme për një grup kriminal të dyshuar për trafikimin e kokainës dhe hashashit nga Amerika e Jugut, vrasje dhe pastrim parash.
Për një periudhë, në media u raportua se Mata ishte zhdukur në Bolivi dhe se nuk dihej vendndodhja e tij. Por më pas hetimet dhe të dhënat e siguruara nga komunikimet në “Sky ECC” sollën të dhëna të reja mbi aktivitetin e tij.
Pas shpalljes në kërkim ndërkombëtar, u publikuan edhe pamje të Matës nga arratia, duke rrëzuar pretendimet se për të nuk kishte më gjurmë.
Nga Ish-Blloku Te Hetimet Për Trafikun E Kokainës
Ngjarja e ish-Bllokut mbetet një nga episodet që e bëri publik emrin e Ervin Matës. Në atë mbrëmje, përplasja mes disa personave përfundoi me vrasjen e Fabjol Gaxhës.
Sipas hetimeve, konflikti përfshiu disa persona, mes tyre Merviol Bilo, Eljon Hato, Ervis Martinajn dhe Ervin Matën. Përplasja fizike u pasua nga përdorimi i armëve, ndërsa Gaxha mbeti viktima e vetme.
Pas ngjarjes, Merviol Bilo dhe Ervin Mata u shpallën në kërkim. Mata u vetëdorëzua disa ditë më vonë, duke mohuar të kishte qenë autor i vrasjes dhe duke pretenduar se ishte sulmuar.
Tashmë, pas vendimit të Gjykatës Supreme Federale të Brazilit, çështja e ekstradimit të Matës kalon në fazën e vendimmarrjes presidenciale. Shqipëria duhet ndërkohë të përmbushë edhe garancitë e kërkuara nga autoritetet braziliane përpara një dorëzimi të mundshëm.
