Një situatë skandaloze është fotografuar pasditen e kësaj të marte, (15 shtator 2026) në zonën e Unazës së Vogël në Tiranë.
Një kamion i kompanisë “ALESIO-2014” është fotografuar duke qarkulluar në një nga zonat më të ngarkuara të kryeqytetit, rreth orës 18:00, në një fashë orare kur lëvizja e mjeteve të tonazhit të rëndë është e kufizuar.
Siç mund të shihet edhe në pamjet e mbërritura në redaksinë e Boldnews.al, kamioni Mercedes, me logon “ALESIO” të vendosur në pjesën e përparme të mjetit, është duke qarkulluar ndërsa pranë tij ndodhet një automjet i Policisë Rrugore.
Vlen të theksohet se këto pamje janë regjistruar në një orar kur qarkullimi i mjeteve të tonazhit të rëndë është i ndaluar në këtë zonë. Sipas rregullave të Bashkisë së Tiranës, qarkullimi i mjeteve të rënda brenda Unazës së Vogël ndalohet nga ora 07:00 deri në 20:00, ndërsa veprimtaria e furnizimit lejohet në fashën 20:00–07:00.
Sipas denoncimit, të mbërritur në redaksi, në kryqëzime kishte edhe punonjës të tjerë të qarkullimit, por askush nuk tentoi ta ndalojë dhe të verifikojë nëse kamioni ishte pajisur me leje të posaçme për të qarkulluar në orarin e ndaluar.
Pamjet e regjistruara në terren tregojnë se betonieret dhe kamionët e tonazhit të rëndë duket se kanë nisur të lëvizin gjithnjë e më të pashqetësuar në rrugët e Tiranës, madje edhe në praninë e efektivëve të Policisë Rrugore.
Ndërkohë vlen të theksohet, se kompania “ALESIO-2014”, emri i së cilës identifikohet në kamionin e fotografuar, është përmendur më herët në një prej procedimeve pasurore të SPAK.
Në korrik 2022, Gjykata e Posaçme vendosi sekuestrimin e kompanisë në kuadër të hetimit pasuror ndaj Anton Gjinajt, i cili rezultonte ortak i vetëm i saj, me 100% të kapitalit.
Sipas SPAK, pasuria e sekuestruar përfshinte disa shoqëri tregtare, mes tyre “ALESIO-2014”, ndërsa në vitin 2023 Prokuroria e Posaçme kërkoi edhe konfiskimin e këtyre pasurive.
Por pavarësisht këtyre të dhënave, dhe kufizimeve të përcaktuara për qarkullim, betonieret vijojnë të lëvizin lirshëm në rrugën e kryeqytetit duke ngritur pikëpyetjen se kush i mbron këto mjete të tonazhit të rëndë që shoqërohen madje edhe nga makina të Policisë Rrugore?
