Atentati me snajper ndaj Gazmir Dacit, Gjykata e Lartë kthen për rigjykim dosjen e Ergys Kolaverit

Gjykata e Lartë ka vendosur të rikthejë për gjykim çështjen e Ergys Kolaverit duke prishur vendimin ndaj tij më 26 tetor në 2022 nga Gjykata e Apelit të Juridiksionit të Përgjithshëm, përmes së cilit ai u shpall i pafajshëm.

Gazetarja Anila Hoxha raporton se vendimi u mor sot dhe pritet të kthehet për rigjykim nga një trupë tjetër në të njëjtën gjykatë.

Apeli i dha lirinë Ergys Kolaverit, i dënuar me 20 vite burg për atentatin me snajper ndaj Gazmir Dacit. Në 30 Korrik të 2016-s, Kolaveri organizoi atentat me snajper ndaj Gazmir Dacit, ngjarje e ndodhur në ambientet e brendshme të burgut të Vaqarrit. Në momentin e ngjarjes, Daci ishte duke dalë në ambientet e jashtme të burgut, kur u shënjestrua me snajper nga një kodër në zonë.

Mirëpo shënjestrimi nuk shkoi ashtu siç duhej, pasi plumbi nuk kapi shënjestrën, Dacin, por një të dënuar nga Kosova. Atentati në fjalë dyshohet të jetë bërë për motive hakmarrje, pasi Daci i mori jetën Gazmir Kolaverit dhe plagosi Robert Kolaverin, vëllezër të Ergys Kolaverit.

I akuzuar për këtë ngjarje nga ish prokuroria e krimeve të rënda Kolaveri ndaj të cilit u zyrtarizuan akuzat e “Vrasjes për gjakmarrje të mbetur në tentativë”, “Plagosja e rëndë me dashje”, “Mbajtja pa leje dhe prodhimi i armëve, armëve shpërthyese dhe municionit” dhe “Prodhimi, mbajtja, blerja apo shitja pa leje e armëve të ftohta”,  për motive gjakmarrje kundër shtetasit Daci.

Lirimi që mori në 2020 nga vendimi i vulosur nga Apeli është vënë në pikëpyetje pas gjashtë vitesh, pasi dosja e Kolaverit është rikthyer së fundmi për rigjykim. Pritet për t’u parë në vijim se si do të shkojnë proceset gjyqësore ndaj Ergys Kolaverit.