Aktivisti Edison Lika ka kërkuar nga SPAK që të përshpejtojë procedurat për heqjen e imunitetit të deputetes Belinda Balluku, duke bërë thirrje që më pas ajo të arrestohet.
Gjatë fjalës së tij në protestë, Lika u ndal te akuzat dhe denoncimet e fundit ndaj qeverisë, duke përmendur edhe çështjen e vilave që, sipas tij, lidhen me Ballukun.
“SPAK ka para syve disa vila të Belinda Ballukut dhe duhet të dërgojë sa më shpejt në Parlament kërkesën për heqjen e mandatit të saj. Arresto Ballukun”, deklaroi ai.
Lika vijoi me kritikat ndaj kryeministrit Edi Rama, duke iu referuar edhe përgjimeve të Ron Yeffet, të bëra publike nga ish-zëvendëskryeministri Arben Ahmetaj.
Sipas aktivistit, këto materiale tregojnë, në pretendimin e tij, mënyrën se si Rama ushtron pushtetin dhe ndërhyn në sektorë të ndryshëm të ekonomisë.
“U bëjmë thirrje organeve të akuzës: Hetoni Ramën. Kemi parë përgjimet e fundit, të cilat na vërtetojnë se Rama sillet si pronar i Shqipërisë dhe privatizon e shet sektorë të ndryshëm të ekonomisë”, tha Lika.
Në përfundim të fjalës së tij, aktivisti kërkoi që edhe ndaj kryeministrit të ndërmerren veprime nga organet e drejtësisë.
“Për këtë Edi Rama dhe qeveria e tij meritojnë të jenë prapa hekurave. Edhe sot kërkojmë arrestimin e radhës. Arrestoni Ramën”, u shpreh ai.
