Ka nisur rreth orës 10:10 seanca e Gjykatës Speciale, ku do të shpallet vendimi ndaj katër ish-udhëheqësve të Ushtrisë Çlirimtare të Kosovës.
6 vjet pas arrestimit të tyre, Gjykata Speciale do të shpallë sot aktgjykimin ndaj Hashim Thaçit, Kadri Veselit, Rexhep Selimit e Jakup Krasniqit.
Seanca po transmetohet drejtpërdrejt në disa sheshe të qyteteve të Kosovës ku janë grumbulluar qytetarë.
Mbështetës të ish-drejtuesve të UÇK janë mbledhur po ashtu pranë ndëresës së Gjykatës Speciale në Hagë.
Seanca në Hagë, trupi gjykues: Nuk ka pasur krime kundër njerëzimit
Gjykata Speciale ka konstatuar se nuk ka pasur krime kundër njerëzimit nga katër udhëheqësit e UÇK-së.
“Lidhur me ekzistencën e një sulmi të përhapur kundër popullatës civile si kusht për krime kundër njerëzimit, Trupi gjykues konstatoi se ZPS-ja nuk ka arritur të vërtetojë se ishte kryer ky sulm i përhapur gjerësisht kundër popullatës civile”, ka thënë kryetari i trupit gjykues.
Një nga konkluzionet e para të trupit gjykues gjatë leximit të aktgjykimit lidhet me akuzat për krime kundër njerëzimit.
Gjatë seancës, gjyqtarët deklaruan se nuk janë bindur se personat e shënjestruar mund të cilësohen si “popullatë civile”, një element që lidhet me vlerësimin e këtyre akuzave.
Seanca në Hagë/ Gjyqtari Smith: 96 persona u vranë nga pjesëtarë të UÇK-së
Trupi gjykues konstatoi se, ndërmjet prillit të vitit 1998 dhe qershorit të vitit 1999, në 12 komuna të Kosovës dhe në një rreth në Shqipëri, pjesëtarë të UÇK-së kryen veprime që çuan në vrasjen e 96 personave që nuk merrnin pjesë aktive në luftime.
“Vrasja e paligjshme si krim luftë, trupi gjykues shprehet se në 12 komuna në Kosova dhe në një vendndodhje në veri të Shqipërisë, u kryen veprime ose mos veprime që çuan në vdekjen e 96 personave që nuk merrnin pjesë në luftime”, u shpreh ai.
Gjykatësi Charles Smith po paraqet konstatimet e trupit gjykues lidhur me akuzën për vrasje të paligjshme si krim lufte.
Specialja: Thaçi kishte dijeni për krimet dhe nuk i parandaloi
Trupi Gjykues konstatoi se Hashim Thaçi dha kontribut thelbësor në zbatimin e qëllimit të përbashkët kriminal dhe ishte anëtar kyç i tij.
Sipas gjykatësit Charles Smith, Thaçi emëroi persona besnikë në pozita të ndryshme për të ruajtur kontrollin brenda UÇK-së, ndërsa disa prej tyre kryen krime ose ishin në dijeni të tyre.
Gjykata konstatoi se Thaçi kishte dijeni për një numër të konsiderueshëm krimesh ndaj personave të konsideruar kundërshtarë, por nuk ndërmori hapa për parandalimin apo ndëshkimin e tyre.
Përkundrazi, sipas Trupit Gjykues, ai mori pjesë personalisht në disa prej këtyre krimeve dhe kontribuoi në përhapjen e informacioneve të rreme për to.
Krerët e UÇK-së shpallen fajtorë/ Thaçi dhe Krasniqi dënohen me nga 25 vjet burg, Veseli 18, Selimi 13
Dhomat e Specializuara të Kosovës në Hagë kanë shpallur fajtorë 4 krerët e UÇK-së, Hashim Thaçin, Kadri Veselin, Jakup Krasniqin dhe Rexhep Selimin, dhe i kanë dënuar në total me 81 vite burgim.
Trupi gjykues konstatoi se Hashim Thaçi, Kadri Veseli, Rexhep Selimi dhe Jakup Krasniqi janë penalisht përgjegjës për krimet e luftës të ndalimit arbitrar, trajtimit mizor, torturës dhe vrasjes së paligjshme.
Konkretisht, Hashim Thaçi dhe Jakup Krasniqi janë dënuar secili me nga 25 vite burgim, Kadri Veseli me 18 dhe Rexhep Selimi me 13.
Pas shpalljes së aktgjykimit dhe dënimeve ndaj Hashim Thaçit, Kadri Veselit, Rexhep Selimit dhe Jakup Krasniqit, seanca në Dhomat e Specializuara në Hagë është mbyllur.
Aktgjykimi i shpallur sot është i shkallës së parë dhe palët kanë të drejtë ta apelojnë atë.
