Analisti Andi Bushati ka reaguar pas postimit të kryeministrit Rama ndaj vendimit të Gjykatës së Hagës për ish-krerët e UCK-së.
Rama zgjodhi ta komentojë vendimin vetëm me një fjalë. Marrë! -shkroi ai në “Facebook”.
Pas këtij qëndrimi, Bushati e ka vënë deklaratën e Ramës përballë rolit që, kryeministri shqiptar ka pasur më herët në mbështetjen e Gjykatës Speciale.
“Po ndonjë shenjë pendese që e përkrahe këtë gjykatë, ndërkohë që kishte forca politike që jepnin argumentet pse duhej kundërshtuar dhe që more helikopterin për t’ua mbushur mendjen shtetarëve kosovarë…?”, shkruan Bushati në reagimin e tij.
Në reagimin e tij, analisti Bushati i referohet një informacioni të transmetuar fillimisht nga televizioni Top Channel.
Në 16 Korrik 2015, televizioni që është dalluar për raportime ekskluzive nga qeveria e Edi Ramës, publikoi një kronikë, në të cilën thuhej se Rama kishte shkuar për një vizitë surprizë me helicopter në Prishtinë, me qëllim që të bindte drejtuesit politikë të Kosovës për miratimin e Gjykatës Speciale.
Në kronikën televizive, të pakundërshtuar nga qeveria, thuhej ndër të tjera: “Top Channel ka mësuar nga burime brenda takimit se kryeministrat dhe ministrat e pranishëm në takim kanë diskutuar për nevojën e formimit të Gjykatës Speciale për krimet e luftës. Mësohet se kryeministri Mustafa dhe zëvendëskryeministri Hashim Thaçi i kanë thënë kryeministrit Rama se janë në koordinim e sipër me të gjithë faktorët relevantë dhe se Gjykata do të miratohet së shpejti në Kuvend”.
Zyrtarisht, qeveria shqiptare deklaroi se qëllimi i vizitës ishte “koordinimi e dy qeverive për Samitin e Vjenës”.
