Spanja përgatit kontratën ‘e artë’ për De la Fuenten deri në 2030 (Detajet dhe shifrat)
Federata Spanjolle e Futbollit është pranë rinovimit të kontratës me Luis de la Fuenten, i cili pritet të qëndrojë në drejtimin e kombëtares deri në vitin 2030. Marrëveshja e re është thuajse e mbyllur dhe tashmë kanë mbetur për t’u përcaktuar vetëm disa detaje ekonomike.
Sipas raportimeve, trajneri spanjoll pritet të përfitojë një pagë prej 4 deri në 5 milionë euro bruto në sezon. Kjo shifër do ta poziciononte De la Fuenten mes trajnerëve më të paguar të kombëtareve në botë. Një prej kërkesave të tij në negociata ka qenë edhe përmirësimi financiar i kontratave për anëtarët e stafit teknik.
Rinovimi vjen pas një periudhe të jashtëzakonshme suksesi për De la Fuenten, i cili mori drejtimin e Spanjës në dhjetor të vitit 2022. Nën drejtimin e tij, “La Roja” ka arritur të fitojë trofe të rëndësishëm, përfshirë Nations League, Kampionatin Europian dhe së fundmi Kupën e Botës.
Kontrata e re pritet ta lidhë trajnerin me përfaqësuesen spanjolle deri në vitin 2030, duke i garantuar atij drejtimin e skuadrës edhe në një prej turneve më të rëndësishëm në historinë e futbollit spanjoll.
Botërori i vitit 2030 do të ketë një rëndësi të veçantë për Spanjën, pasi vendi do të jetë një prej organizatorëve të kompeticionit. Në këtë mënyrë, De la Fuente synon të udhëheqë “La Roja”-n në turneun e zhvilluar në shtëpi, me Spanjën që pritet të paraqitet si kampione në fuqi.
