Shtetet e Bashkuara të Amerikës kanë reaguar pas shpalljes së aktgjykimit nga Dhomat e Specializuara të Kosovës në Hagë ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Departamenti amerikan i Shtetit deklaroi se SHBA-ja e respekton vendimin e gjykatës dhe u bëri thirrje të gjitha palëve që ta pranojnë aktgjykimin, duke shmangur çdo retorikë që mund të nxisë tensione.
“Ne e respektojmë aktgjykimin e sotëm të Dhomave të Specializuara të Kosovës”, tha një zëdhënës i Departamentit amerikan të Shtetit për Radion Evropa e Lirë.
Uashingtoni theksoi gjithashtu mbështetjen për drejtësinë ndaj të gjitha viktimave dhe familjeve të tyre, si dhe për parimet e llogaridhënies, procesit të rregullt ligjor dhe sundimit të ligjit.
“U bëjmë thirrje të gjitha palëve që ta respektojnë vendimin e gjykatës, të shmangin retorikën nxitëse dhe të vazhdojnë të punojnë drejt një të ardhmeje paqësore dhe demokratike”, u shpreh zëdhënësi i Departamentit të Shtetit.
Vendimi i Dhomave të Specializuara të Kosovës u shpall më 16 shtator në Hagë, pas procesit gjyqësor ndaj katër ish-krerëve të UÇK-së. Gjykata i shpalli ata fajtorë për katër akuza për krime lufte, ndërsa i liroi nga akuzat për krime kundër njerëzimit.
Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet. Në total, dënimet arrijnë në 81 vite burgim.
Aktgjykimi është i shkallës së parë dhe nuk përbën vendim përfundimtar. Mbrojtja ka paralajmëruar se do ta apelojë vendimin, ndërsa procesi gjyqësor pritet të vijojë në instancat përkatëse.