Eno Agasi, kushëriri i Ergys Agasit, është arrestuar pas rreth tetë muajsh në arrati, pasi ishte shpallur në kërkim nga drejtësia.
Sipas raportimeve në media, Eno Agasi është arrestuar te Kodra e Diellit teksa po lëvizte me automjet. Ai ishte në kërkim pasi Gjykata e Tiranës kishte caktuar ndaj tij masën e sigurisë “arrest në burg”, i akuzuar për pastrim parash dhe veprime që pengojnë zbulimin e së vërtetës.
Eno Agasi dyshohet se ka lidhje me zhdukjen e shisheve të shtrenjta të verës, të cilat ishin sekuestruar nga SPAK në dhjetor të vitit 2025, gjatë operacionit ku u shpall në kërkim kushëriri i tij, Ergys Agasi.
Pas sekuestrimit, vera ishte inventarizuar dhe ishte lënë në një kantinë, pasi për shkak të orarit të vonë nuk mund të transportohej nga autoritetet doganore. Megjithatë, kur punonjësit janë rikthyer të nesërmen për ta marrë, shishet e verës nuk janë gjetur më në ambientet e kantinës.
Pikërisht për këtë ngjarje, Eno Agasi dyshohet se ka ndërmarrë veprime që kanë penguar zbardhjen e plotë të rrethanave të çështjes, ndërsa ndaj tij vijon hetimi edhe për pastrim parash.
Ndërkohë, Ergys Agasi, një prej personave të shpallur në kërkim nga SPAK në kuadër të dosjes së Agjencisë Kombëtare të Shoqërisë së Informacionit (AKSHI), u arrestua më 26 gusht, në Durrës dhe u la në burg nga GJKKO.
Në momentin e arrestimit, Agasi udhëtonte me një automjet tip “Audi”, së bashku me ish-zyrtarin e Policisë së Elbasanit, Uljan Shpataraku. Ky i fundit u arrestua gjithashtu dhe u la në burg nga GJKKO pasi akuzohet për “Përkrahje të autorit të krimit”.
Ergys Agasi ishte shpallur në kërkim prej dhjetorit të vitit të kaluar, në kuadër të hetimeve të SPAK për një grup të dyshuar kriminal që lidhet me manipulimin e tenderave të Agjencisë Kombëtare të Shoqërisë së Informacionit (AKSHI).
